Dalene Kooper
Ovitjitua vyOtjiṱiro Otjindjandja oure wotjiveke tjitjazuko nganduu komayuva womasuviro ngazuko mbyari mOkakoverua ohepero kokutiza omakuruhungi.
Ombara ya Kamatapati mOuhonapane wOmbazu wOvaharero, Tuendeekuje Rukambe-Uazukuani, ngwe kweri kwambere kozondekurona zOnguena ama kuramenepo Ombara Otjitambi, Mutjinde Katjiua, matja.
Ozondekurona zOtjiṱiro Otjindjandja tjOnguena kehi yehika razo rovanane vombazu, indi Onama Traditional Leaders Association, ousupi ONTLA, ouwe wotjiveke vari novitjitwa vyomazemburukiro wOtjiṱiro Otjindjandja mOkakoverua. Mbyere
komayandero omayuva womasuviro ngazuko Osondaha. Tjiyari omurongo nayevari komweze imbwi kOzonjanga, oro Ovakuena ndi va keka otjeyuva rawo romazemburukiro wOtjitiro Otjindjandja.
Tjimuna ozondekurona zarwe tji za keka tjiyeri 28 ku Kambundu, oro nai ndavarwa kotjiveta iyohoromende Otjeyvuya Romazemburukiro wOtjiṱiro Otjindjandja (Genocide Rememberance Day).
Natja omawonronganeno inga, oyo ngawanisire ovimbumba pekepeke vyozondekurona zOvaherero nOvakuena novanane vombazu vyazo, otjihorera otjiwa mokati koviwana “mbya tira pamwe” oruveze rOtjitiro Otjindjandja tjOvaherero nOvakuena. Naweza kutja omazemburukiro yena orupa orunahepero tjinene moku yanÿimuna omitanda notjiwaṋa tjouye. Amatja ovandu ovengi muwo mumuna Ovandoitji, ngamba kavetjiwa ovitjitwa yomakuruhungi inga nu munao omahongero noma yandimunino otjeri ohepero.
Ombara Dawid Hanse, Omuhaamise wONTLA, waiahamenwe omutima kutja Otjiṱiro Otjindjandja katjimo kaparukaze movirihongwa mozosikore. “Ohepero yoma woronganeno inga okuyandja ounongo ohunga nomazepiro ngatjitwa iyOvandoitji koviwan vyOvakua komitanda vyetu. Nokuraisa omwano ovitjitwa imbyo mbye tu ṱuna ngamba. Omerizirira wetu okuserekarera omakuruhungi wetu oveni,” Ombara Hanse matja. “Omazemburukiro nokuhino omasorero kapuwo.
Otjitiro Otjindjandja matjiso okwiitaverwa okuura, atjihongwa natji ţunwa okutuurungira momirari omizikame vyotjivara vyotjisuta,” Orata yOkarukondua Komatoororero ka Tjoruuma, William Minnie, watjere nao mehungi kuna Joe-Chinthia Garisesa komurungu wovitjitwa.