OTAMANZI – Ovakalimo komukunda Omutekwa moshikandjohoololo Otamanzi ota va nyenyeta tava ti paife ovanahambo vavo ota va fiye po oilonga shaashi va tila eendjaba.
Edi ove di popya oshivike sha dja ko pefimbo lomutumba wa unganekwa kouministeli wounamapya nounaimuna, omeva, eeshi nomatalululo omadu.
Elalakano lomutumba okwa li okukundafana nghene ovanyasha tava yambididwa okukufa ombinga mounamapya.
Oshiwana sha dja moshikandjohoololo shaTamanzi okwa li sha holoka momwaalu muhapu okutopolafana omayele pamwe nomupedu minista mouministeli wounamapya Ruthy Masake.
Ova lombwela omupedu minista kutya ova taalela eshongo linene lovanailonga vavo vomomaumbo tava fiye po oilonga molweendjaba tadi enda enda moshikandjohoololo shavo.
Natango, ova yandja omanyenyeto avo kutya omapya avo needalate okwa ningwa oihakanwa yokuteyelwa pendu keendjaba.
Omunafaalama umwe, Sioni Nehale okwa holola kutya omunahambo waye paife okwa ya konima eshi a kala alushe a mono eendjaba ngeenge ta lifa.
“Okwa lombwela nge ta ti okwa tila okudipawa keendjaba ndele tai,” ta ti.
Okwa didilikwa oshikandjohoololo shaTamanzi osho shimwe moshitukulwa shaMusati ha mu kala muna eendjaba dihapu unene tuu komudingonoko Amarika oko ku na eehambo.
Neudo koshikandjohoololo shaTsandi okwa lopotwa omukainhu weedula 48 a xulifa eshi a dipawa kondjaba.
Omupedu minista Ruthy Masake okwa nyamukula ta ti oshiwana na shi kale
kokule neendjaba molwaashi oda nyika oshiponga.
Okwa lombwela kansela woshikandjohoololo shaTamanzi osho yo oshiwana opo a shivifile ouministeli womidingonoko kombinga yoshikumungu sheendjaba.
Efiku lomutumba oshiwana okwa li sha mona omhito okupula omapulo kombinga yoipambele younamapya.
Masake okwa li a enda pamwe novanambelewa va yooloka okudja kouministeli waye ovo kwa li navo tava nyamukula omapulo oshiwana.