Oudano woshikando oshitivali shokatanga kokeenyala ka shivika nawa volleyball otau dana mongula modoolopa yaNdangwa omo ovakainhu novalumenhu tava kufa ombinga mongula. Omafiyafano oudano ou otaa tameke potundi 15h00. Oudano ou owa tamekwa omudo 2024 melongelokumwe noMTC. 

Okwa yelifa ta ti oudano ou okwa shipalekwa kehangano lomakwatafano loMTC noshimaliwa shomiliona imwe. Omukwatakanifi womaudano Superintendent Johanna Malakia koshikondo shomavyulunghalo okwa hokolola ta ti oishe oi li peenhele mongula. Okwa ti okwa teelelwa eesipana 16 tadi ka kufa ombinga momaudano aa mongula. “Oudano ou ohau danwa omwedi keshe koitukulwa ya yooloka,” ta ti. 

Malakia okwa ti oudano ou okwa li wa danwa lwoshikando shotete kodoolopa yaTjiwarongo omwedi wa dja ko. Okwa ti ovanhu hava kufa ombinga koudano ou vamwe ova dja komandiki omayulunghalo, ketanga leameno, koshikondo shopolifi osho yo koiputudilo ya yooloka ngaashi Unam. “Oludi loudano ou owa fimana shaashi otau eta oukumwe mokati koshiwana nosho yo okuyandja omhito kovanhu va longife ounongo wavo,” ta ti. Okwa ti oshiwana osha manguluka okukala sha holoka okutala omanyakwa eshi taa ulike ounongo wavo okudana okatanga kokeenyala. “Otwa teelela ovadani va kale va fika nena okudja koitukulwa ya yooloka,” ta ti. 

Omupedu Mayola woodolopa ya Ndangwa Nicodemus Amadhila oye ka patulula oudano ou pambelewa ponhele yangoloneya waShana. 

fhamalwa@nepc.com.na