OLUKEKETE- Omupresidente Netumbo Nandi-Ndaitwah okwa pula ooluxupe voCassinga opo va shange omambo taa popi kombinga yondjokonona shaashi ota shi yandje ehongo komapupi okomongula. 

Okwa ti okwa hala okumona meengulumambo muna omambo a shangwa ondjokonona yoCassinga. 

Omupresidente edi okwe di popya Omaandaxa kefiku ledimbuluko laCassinga olo la dimbulukiwa komukunda Olukekete moshitukulwa shaMusati. 

Efiku ola dimbulukiwa koshi yoshipalanyole tashi ti okudimbuluka oonakulwa vetu nokuvatumbaleka. 

Oixupe moCassinga okwa li va nyika oluhodi tava imbi omaimbilo okudimbuluka vakwao ovo va xulifa. 

Oshiwana, ovaleli vopapolitika, ovaleli vopamifyuululwakalo osho yoonakulwa vakulu okwa li va holoka momwaalu muhapu okudimbuka efiku eli. 

Efiku 4 Mei 1978 oha li dimbulukiwa omudo keshe omo ovanhu vahapu mwa kwatelwa ounona va kanifa eemwenyo davo moAngola. 

Ovanhu ova xulifa omanga vamwe ova lemana konima eshi va ponokelwa kovakwaita vokatongotongo mokamba oyo kwali ya nunimwa oomeme nuunona. 

Omupresidente okwa pula oshiwana opo shi kale shina oukumwe wokudimbuluka efiku loCassinga molwaashi efiku ola fimana mondjokonona yaNamibia. 

“Natu fimanekeni oilonga ya longwa komapendafule ovalumenhu novakainhu. Ovanhu ava okwa li ve li moita tava lu okukondjela Namibia a manguluke,” ta ti. 

Okwa weda po ta ti emanguluko ina li etwa po noupu shaashi osha pula eemwenyo dovanhu osho yo ovanhu va lemana. 

Nandi-Ndaitwah okwa Namibia ota twikile okudimbuluka efiku e li shaashi ovanhu ovo va xulifa ova dana onghandangala ya kula. 

Omupresidente okwa ti ongudu yoswapo oya pandula oonakulwa vakulu molwaashi ova longa oilonga tai hokifwa okukondjela emanguluko loshilongo. 

Ignatius Mwanyekange ou e li naye axupa moCassinga, nokuli a popya ponhele ya vakwao okwa ti efiku oha li va etele oluhodi shaashi ohave li pula vakwao ovo va xulifa moita. 

“Oshiponga shomboma oyo ya dipaa vakwetu natango ota shiluma momitima detu,” ta ti. 

Okwa ti ka kwa li shipu okukala moAngola pefimbo loita shaashi ova mona oixuna eshi va dengwa. 

Mwanyekange okwa ti eshi otashi va dimbulukifa kutya emanguluko ola dja poundju. 

Okwa pula epangelo opo li twikile okuyambidida oonakulwa vakulu. 

“Onda pandula epangelo letu eshi lina oshisho okudimbuluka efiku eli,” ta ti. 

fhamalwa@nepc.com.na m