Omupresidente Netumbo Nandi- Ndaitwah okwa hoolola Anne- Marie Nainda a kale kakukutu ketanga lopolifi pakafimbo. 

Nandi-Ndaitwah etokolo eli okwe li ninga eli kolelela kokatendo 34(4)(c)(bb) mekotamhango loshilongo. Okatendo ota ka holola kutya Omupresdiente okuna oufemba woku ulika kakukutu komatanga opolifi moshilongo osho yo eenghono dokukufa ko oo eli ko. Nainda okwa ya ponhele yaKakukutu komatanga opolifi mukulu Joseph Shikongo, oo vati a kufwa moilongwa oule weemwedi 12. Etomeno lekufo moilonga laShikongo lopakafimbo ina li tumbulwa fiyo opapa. 

Shikongo okwa hangika nale a ya moshipundi shetulumoko, okwa li ashike a wedelwa ko eedula nhatu moilonga yaye youleli kOmupresidente mukulu Nangolo Mbumba. 

Kundana okwa koneka kutya konima yeemwedi 12 odo a kufwa moilonga manga, okondalaka yaye otai handika ya pwa ko nale. 

Omushangwa wa pitifwa kombelewa komupresidente owa holola kutya Nainda okwa pewa etemo laye lipe oule wodula imwe ashike. “Onda teelela a kale a wanifa po oilonga yaye pambelewa nopashili, ye a kale yo ena etanga ta li amene Omunamibia keshe. Ota ka wanifa po aishe tai kala ili koshi yelelo laye,” Omupresidente ta yelifa. Nainda oye omuleli wotete omukainhu ta pewa ombadi youkakukutu komatanga wopolifi. Okwa kala omupedu waShikongo okudja mo 2017. Nainda ondjila yaye yometanga lopolifi okwe i waimina mo 1992 onga constable, noku dja opo okwa kala ta pewa eenghatu dopombada moilonga yaye, fiyo oye yi a pewa kOmupresidente oupeha woukakukutu komatanga. 

Okwa kala yo nokukalela po oshilongo komutumba wo Interpol Excutive Committee mu Africa, oko a yandja noku pewa omatwomokumo osho yo eendjidikila dipe doku keelela oimbuluma moshilongo, okukeelela omakwato ovanhu eembyabona osho yo ekandulale po lelongifo lomapangwe noingangamifi ya yooloka. 

taimihaihambo2000@gmail. com