Abraham Mwanyekange
Omudengingonyo Fililpus Nghitumbwa nedina la shiivika nawa Energy okwa pula epengelo opo li yandje oilonga kovadengingonyo ova Namibia.
Nghitumbwa edi okwe di holola keengula donghela konima eshi a denga mo omudengingonyo Leonardo Carillo, omukwashiwana waColombia koitwa konima yomadingonoko 12 sha ningilwa moWindhoek.
“Onda hala oku lombwela minista weameno loshilongo osho yo minista woikwameni opo vetu pe oilonga. Onda kalela po nokuyambula po edina loshilongo Namibia pondje yoshilongo oikando ihapu. Ka kele fiyo opaife ina tu valulwa ngee nafye otuna oshilonga moshilongo shetu,” Nghitumbwa ta holola.
Nghitumbwa konima eshi a vena oudano okwa mona omhito yoku ka kondjela epaya lounyuni moshivixa shoSuper Bantam molwaashi mopaife oye e li ponomola onhivali mounyuni.
Mwene woMtc Sunshine Boxing Academy Nestor Tobias okwa ti okwa nyakukwa unene eshi Nghitumbwa pamwe novadengingonyo vakwao va findana po omaudano avo.
“Paife ohatu ka konghola kehangano loWBO opo li tu pe omhito tu lwile epaya molwaashi ofy e nanaa tuli ponomola oyo yina okulwila epaya,” ta ti ngaho.
Tobias okwa pula epangelo nomahangano opaumwene opo a yambidide ovadenginhonyo Ovanamibia molwaashi ota va tula epandela loshilongo pombada.
Efiku olo tuu olo, ovadengingonyo vakwao ova kufa ombinga noidjemo yavo oya li tai shapula.
Mepaya loWBO Africa Feather Weight Mateus “The Beast” Heita okwa denga mo Zolisa Batyi waSouth Africa konima yomadingonoko 12.
Moshivixa shoInternational Welter Weight Harry Simon Jr okwa denga mo Freeman Mabvongwe medingonoko etitano.
Omanga oInternational Bantam Weight Joy Nangolo wa Namibia okwa denga mo Rofhiwa Nemushungwa konima yomadingonoko ahetatu.