Xoa-aob: Obrein Simasikub
ǀAEǁGAMS – 1 800 Xa !nāsa ǁkhāǁkhāsenaon, !gōsase Xrat 1sa xu 8s kōse hân ge ǀKhomas ǀKharib skolgu !nâ noxopa soana hō tama hâ. Nē mâsiba oresa hōbas ases ge ǀkhomas ǀkharisi ǁgau!nâs direktoratsa !nubu, ǁaegub ǀnōb di tsî gaxu ǁaeb di sîsenǀgauga nî sîsenxa kai.
ǀKhomas ǀKharisi ǀAwemā!nans di ǂhaitsi !gaeǁaredi mâisas, Lydia Shifas ra mîsa !oan ge ǁîna ǁaerob ǀgaib di ores ase tentde ǁkhāǁkhā!nā-omdi ase nî ǂnaumâi ǁnaetisa ǁkhāǁkhā!nā-omdi nî ǂnuwihes kōse. ǁGam-i ā!khaigu tsî ǂkhari-omn ge nēpa nî ǀarohe ǂhâǂhâsa ǂhâsigu ǁkhāǁkhāsenon tsî-ǁgau!nâ-aon digu ai ǁnā !nubu tsî ǁaegub ǀnōb ǁaeb !nâ dīǀoaǀoas ase.
Direktorats ra īǁkhā i as kōse ǀaweǁguiga dī nē mâsiga ǁkhaes !aroma, xaweb ge nē mâsiba ǀnî skolgu ge ǁkhāǁkhā!nā-omde a ǀoroǀoros tsî Xrat 8s !nâ ge ǂnû!gau ǂgui !gôab di ǁkhākhāsenaon xa ge !aromahe.
!Aruǀî hâ !gomsib ge ǂgui !gôab di ǁgûn hîa ǀasase ra sîsen ôan tamas ka io sîsengu ǀkha ǂnûibēhes din hîa ǀgôana soana ra ôaban xas tsîna ǀKhomasa ǀgaisa ǁgoaǂuis ase ība. Nēsis kōsen ge ǁaupexa 1 187 Xrat 8 ǀgôan tsî 652 Xrat 1 ǀgôana soana hōbahe tama hâ. “Nē !gôab ge !âubasenhe rasa !oa noxopa a ǂharo ǁkhā ǂgui ǁgûn !onkhao hâse soan !aroma direktorats tawa sī ra xoamâisen amaga,” tis ge Shifetasa ge mî.
Shifetas ge !nubusib sekondere skolgu dib ǁgoaǂuis ase nē direktoratsa ība !khaisa gere ǂan!gâ, ǂgui !gôab di ǂam skolgu hîa nē kharib !nâ hâgu ǀkha i ga a ǀgoweǀnōhe o. ǀKhomas ǀKharib ge 47 ǂhanub ǂam skolga ūhâ tsî 29 sekondere skolgu ǀguiga. Nē mâsib !nân ge ǀgaisase Xrat 8 ǀgôana ra tsâǀkhāhe.
Direktorats ǁgau!nâs dis ge hoa ǁgûn hîa noxopa ǀgôan âna skol-e hōba tamana ra ǂgan, in Immanuel Shifidi ǀGapi Skoli Sali tawa si ǀgôana xoamâi. Nē xoamâidi ge ǂoago wekheb ai nai ge tsoatsoa tsî 23 !Khanni dis kōse nî hâ, wekheb tsēdi !nâ ǁgoagas 08h00 xu 12h00 kōse.
ǁKhās ge Xrat 1 ǀgôan !aroma Soccer House tawa Katuturas !nâ nî dīhe.