WINDHOEK – Ame kuna kuyimona asi kukara hompa gorudi rwaUkwangali kapisi sirugana sosireru, morwa ngani mono asi vahompa vahovereko ngapi ndi omama ngapi ngavapitimo noudigu.
Nye ame kuna kuyimona asi nanipitamo tupu yimo ana kutanta Eugene Siwombe Kudumo” ogu kavapere asi yige ana kukwateramo uhompa waukwangali” Ntudi siyowo ntani nayikara asi kapisi nyame hompa, yimo ana kutanta Kudumo gonomvhura 44, nomu yina kumoneka asi tavakamutungika hompa ogu nakapangera rudi rwaukwangali. Apa nye kauyungire kosayitunga zaNew Era, age katente asi ana lipayikire mosirugana esi sosipe.
Kuna kara sidigu nye ame kuna kuyimona asi tani kagusa uhompa ou, morwa ame gumwe name gezimo eli lyouhompa, yimo nakulira kwadeurange nokupisurange mekoro lyetu.
Vakurona vange, vahekuru nomasimbi ngagavaterange nisikisemo eyi yatumbukira hompa. Kudumo kwamutumbura ntani age kwamulikida kovantu yikando yoyinzi omu gayirugene nakufa Hompa Daniel Sitentu Mpasi, omu ngatanta asi gahepa kuliwapayikira akaguse uHompa nsene asi Sitentu ana kapirapo. Mukurona gendesi vakasela vahompa Joseph Kandjimi kayinkondopekere eyi asi Mpasi ngarugurura mbudi ezi nokulikida asi age kwahere asi Kudumo akaguse Uhompa apa gadogoroka.
Nampili pepongo lyomwaPembagona 2014, lyokuhulilira, nakufa kwatente asi twahepa kuruganena kumwe naKudumo, morwa Kudumo ngapumbwa mbatero zetu yimo ana kutanta Kandjimi. Nye kuna kumoneka asi vantu vamwe megendeso lyorudi kapi vanayihafere.
Awo kuna kumoneka asi kuna kara nomalikwamo peke gehi yipo asi Kudumo ngano gahakagwana evango lyoumpitisili eli lyoUhompa.
Awo kuna kuuyunga asi morwa simpe munona kapi ana kara noudivi wokupitisira rudi oru moomu yawapera. Vantu owo vana kurugana oyo mfudi tupu vana kara nazo kapi hena vakara nononkondo dokutokora asi yilye ngano nakara Hompa, morwa Hompa ogu katusigire nare gagava asi ngano yilye nakakara Hompa ano vezimo lyouhompa nawo vayitambura. Ame mokukara munona kapisi konda ozo, morwa apa gagusire Sitentu uhompa nage kwakere munona yimo ana kutanta Kudumo. Mpasi kwadogoroka kwedi kakupwire mosipangero saNkurenkuru moKavango goutokero nonopmvhura 80, omu gakara asi hompa nomvhura 35.
Kudumo mitili gaulirongera, ano ngesi kuna kara murugani moministeli zerongo koruha royimaliva, mberewa zonone zomukunda Kavango goupumezuva.
Age kwakere mosirugana esi kumwe naKaruyeva Ernestus, Sikongo Joseph Sivaku, Hamutenya David Hipulua, Mufenda Gideon Nestor Siwombe naJosef Kandjimi, Kudumo kwamupere evango lyoukurona movakansela wopampo morudi rwaukwangali mokwedi kwaNsinano 2009.