WINDHOEK Omasiku ga zi ko, Namibia naDe Beers oya ningulula euvathano li nasha nokulanditha okawe ndyoka tali ka gandja omauwanawa goopelesenda dhi thike pamwe ano 50/50 kuyo okuza muuwe mboka tau hogololwa, tulwa ongushu, tau landithwa komalandithilo moshilongo nopondje. Nonande euvathano ndyoka lyoomvula hetatu, opo ashike lya shainwa kOminista yOomina nIikwankondo, Erkki Nghimtina nomunashipundi gwaDe Beers, Nicky Oppeinheimer, euvathano ndika olya yile miilonga esiku lyotango lyaJanuali 2006 konima sho omasiku galyo ga pwile ko muDesemba 2005. Monakuziwa, euvathano ndyoka okwa li ashike lya kwatela mo ethimbo lyuule woomvula ntano, kakele ndyoka lya shainwa ngashingeyi otali kala nongushu sigo omasiku 31 Desemba 2013. Etsokumwe ndika epe oli na ondjokonona oshoka olya etitha po ehangano epe Namibia Diamond Trading Company (NDTC) ndyoka li na oshinakugwanithwa shokutula ongushu kuuwe waNamdeb, oku wu hogolola, okulanditha noku wu halitha paipindi. Omategameno oge li mpoka kutya ondondo yongushu yokawe otayi vulu okuya pombanda sigo oobiliyuna mbali miimaliwa yaNamibia okuthika momumvo 2009. Aawegi naahongi yokawe moshilongo oye na ompito ombwanawa okulikola sha okuza muuwe mboka tau landithwa okupitila moNDTC. Pauvathano ndika epangelo otali ka kala omunashipambu okupitila moNamdeb. Omahangano gokuteta nokuhonga okawe natango otaga ka likola sha oshoka otaga ka mona uuwe okuza koonzo dhopaali, tango okuza muuwe womoshilongo okuza kuNamdeb nolutiyali otaya mono okuza koDiamond Trading Corporation (DTC). Pauvathano ndika epe, otapu ka kala egandjo lyomaunongo ogendji, nomalandithilo otaga ka ya pombanda nokuhwepopaleka ontseyo yopautekenika koofambulika dhokuteta nokupolisha uuwe moshilongo. Namibia oku na ompito ombwanawa okweeta po oompito dhiilonga mbyoka ya pumbiwa unene noonkondo oshowo okundjeka po iiyemo yoshiketha shepangelo oshowo okuyambula po oshikondo shuutalelipo.