MoVenduka-Ministera gokuhova gougendero nomagwanekero age hena kwakere hamutjangagona gefiro sinka vakwayita Richard Kapelwa Kabajani kadogorokere moune wakapita womazuva 17 Kudumonkuru,mosipangero sepangero saKatima Mulilo. Ogu ana kara nonomvhura 64, kaligende membo lyendi moune kongurova age yiyo kadogorokere konyima tupu zokaruwogona mokukasika kosipangero. Kabajani ogu gakere momavango gokulisiga-siga meparu lyendi kwakere ministera gevhu nouturo ntani taya kara hena ministeragona govadinkantu nomaudano kwamuhampuruka momazuva 15 Murongankuru 1943,komukunda ava tumbura asi Ivilivinzi koyiha yaKabulabula koutokero waCaprivi.Age gumwe govantu wokuhova ava vadukire moCaprivi vaze moZambia 1964, vaze dogoro koTanzania oku gakakere siruwo sosire.Age kwakere gumwe gwava vakakere pepongo lyombunga zoSWAPO eli lyakakerere koTanga moTanzania eli lyakakereko siruwo sokilisimisa nomumvhogomupe kutunda mo1969-1970.Mo1983,Peter Mwesihange tavamupe hamutjangagokukwateramo govakwayita wombunga zoSWAPO Konyima tupu apa gafire Peter Nanyemba mwaKudumogona 1983,Kabajani yipo vamupere akare munona gwaMwesihange. Nakufa kwakamudewire ukwayita kosirongo saRusia ano apa gakamene edeuro olyo yipo vamupere ayarugane komberewa zapresidente goSWAPO dogoro ezuva lyendi lyokutengura koNamibia mo1989.Kabajani kwamupere sinka aka kare mukurona gokugendesa mahoroworo gokuhova moCaprivi ntani hena kwakere nage gumwe ogu gatjenge edi veta lyosirongo ntani hena taya kara gumwe gombongarero zanavenye kutundilira kombunga zoSWAPO. Presidente gokuhova kamarada Sam Nujoma kwapere Kabajani ministera gokuhova gougendero nomagwanekero,ntani ministera govadinkantu nomaudano simpe tava yamupe ministera gweyiyevhu dogoro tava yamutumu aka kare mukarelipo Namibia kosirongo saCuba komeho ayahageke upolitika mo2004. Ministera ogu gwanare kwayakara momukunda gwaCaprivi nomvhura ntatu edi ana yakara gahana kurugana, omu vamuruganesa asi mugavi magano paupolitika momukunda gwina.Apa vakadene ezuva lyomapenda momukunda gwina Kabajani kwakamupere medaliya zoupenda ezi gakamupere presidente Hifikepunye Pohamba. Apa vamupere medaliya ozo kamarada Pohamba kwatente asi Kabajani vahepa kumufumadeka morwa age kwakere hamutjangagona govakwayita wombunga zoSWAPO ntani eyi garuganena vaNamibia yinene.Yipo nye asi mukunda ogu vahepa kugutara asi kuna kara nomapenda dogoro yipo twayagwana emanguruko.Kabajani kwaparuka nozina,mukadendi vana vatano novamumbya vendi. Apa gakatengwire koyirongo yoponze mo1989,vamumbya vendi noguhwe awo kuna kuparuka.Oguhwe kwadogorokere mo1993,ano monomvhura dokukwamako yiyo gaya zumbanesa vamumbya vendi.Gumwe gekoro katente asi simpe kapi vana diva asi yinke yina muli nye age kwahepa kouvera womutjima siruwo sosire.Simpe kapi vana diva asi ngapi vana kumuhoreka nye New Era ana gwana asi malikundo kuna kutwima vatare asi ngapi nokupi navamuvhumbika.