Omukiintu omunamimvo 35 okwa ponokelwa noku yugwa iimaliwa N$32 500 koomuma kookalyamupombo, mboka ya ponokele egumbo lye muumbangalantu wOshakati.
Omukiintu ngoka omunangeshefa okwali a gandja ondjembo ye, oongodhi dho peke, omahwiki goko mutse goobrazillian, naayihe kumwe oyina ongushu N$66900.
Omupopiloko gwopolisi moshitopolwa shaShana Inspekta Thomas Aiyambo okwa ti, oshiningwanima shoka osha holoka Osoondaha lwopotundi 20h30 yuusiku momukunda Okaku kaNangula.
“Aafuthi mboka anuwa okwali ya ponokele omukiintu ngoka omanga ali ta ikoho, sho anuwa ali a mono aalumentu yeli yaali ya homata omakatana noombele, noku mufala momunda ye, moka aadhamo natango aalumentu yatatu ya homata oondjombe,” ta hokolola ngaaka.
Otaku hokololwa kutya aafuthi mboka okwali ya matuka po noohauto dhili mbali, no kwali yathigi aanegumbo ayehe ye yamanga noku ya patela megumbo.
Aiyambo ta ti, oyali wo ya matuka po nooshapi paali dhiihauto.
Moshiningwanima inaashifathana omukulupe gwomimvo 62 okwa yugwa iimaliwa N$4000 mbyoka yali mondjato ye yo peke Olyomakaya.
“Ondjato okwali ya ya kulwa po matundji ge, sho ali a kuutumba mohauto, sho alefa oohauto okuya kOkalongo,” ta ti ngaaka.
Ta hokolola ta ti, oshingwanima shoka osha holoka moshanga sho mutenya, komeho gwoombelewa yuuministeli wemona mOshakati.
Opolisi moshitopolwa shaShana oyi li molukongo lwaafuthi mboka, na kehe ngoka ena uuyelele wa mboka taya longo iilonga yatya ngaaka na lopotele opolosi yili po pepi naye.
“Oshigwana nashi longele kumwe opo shi kalemekwatathano ewaanawa oshowo okulwitha noku hulithapo omawupyakadhi gatya ngaaka,” Aiyambo taku magidha.
Aiyamo okwati, iiningwanima yaafuthi taya yugu oshigwana, oya uka po mbanda, unene moshitopolwa shaShana onkene kehe gumwe ota indilwa opo a kale ena ongodhi yo polisi, opo yi vule oku kwathela mbala uuna pweya omawupyakadhi gwoludhi ndoka.