OMAALALA – Omulumenhu weedula 58 okwa pewa omhito yoku lifutila modolongo molwa oshibofa shokukwatakwata okaana paixulo.
Eshi a holoka momhangulilo mEtitano, Victory Gabriel, omukalimo womukunda Omaalala mOshitukulwa shaShana okwa pewa elifutilemo loN$1500. Otaku fekelwa Gabriel a kwatwa po shaashi vati taku fekelwa kutya okwa kwatwa okamatyona keedula 13 koulumenhu noku ka kaleka meumbo laye omafiku onhumba, iha kai kofikola.
Oshibofa osha undulilwa komafiku 21 Juli 2025 nelalakano opo kuningwe omakonakono omoule.
Oshiningwanima eshi vati osha ningilwa mOmaalala okudja 2024 lwoikando ya yooloka.
Omukulunhu koshikondo shokukonakona oimbuluma moshitukulwa shaShana omupedu Commissioner Fredick Ndjadila okwa hokolola ta ti omutamanekwa oha u fana ounona voumatyona keumbo laye ndele tava ningi omafiku tava di keumbo laye.
Opolifi oya hokolola tai ti efimbo loufiku omufekelwa oha nangala monduda imwe noumatyona, ashike vati oheva lombwele va dule mo oikutu.
Vati oha ti meumbo laye omu na oshilulu onghee ka shi hole ovanhu va nangala ve na oikutu.
Omakonakono opolifi otaa twikile kombinga yoshikumungu eshi.
Ouyelele ou owe ya kombada eshi umwe womoilyo yelelo lofikola kwa Ii ta popi komutumba wovakwashiwana nopolifi kwa li wa unganekwa kukakukutu komatanga opolifi Inspector General Joseph Shikongo.
Oshilyo osho osha ti omulumenhu oo oha kala ta longo ounona voumati oku ya moixulo, ye oheva indike oku ya kofikola. Ashike Gabriel okwa kwatwa po ashike shina sha nokamatyona kamwe.
Ovaneumbo vokamatyona aka ova lombwela Kundana tava ti kave udite ombili kombinga yoshiningwanima eshi.
Umwe womeumbo okwa hokolola ta ti omulumenhu ou oha nangeke ounona keumbo laye ndele teva lombwele ve mu telekele ombelela yoshingulu.
Okwa ti ounona omafimbo amwe ohava ningi omafiku ihava i kofikola ve li ashike keumbo lomufekelwa ou.
Ota ku hokololwa kutya omulumenhu ou oha di pomukunda wavo ashike ina hombola.
Opolifi oya koleka tai nakuninga oshihakanwa ina va twalwa opo a ka ningilwe omakonakono opaunamiti.
– fhamalwa@nepc.com.na