Omuthiyas
Aitsama ǂharugutsoatsoa-aon Oshikoto ǀKharib din ge ǀgaisase ǀgomǀgom!gao tsî ǂhanuba koasa ge mā, mā!hūs hîab ge sîsenosiba ǀoroǀoros ai a ūb ǂama. Sîsenosiba ǂhâbasa ǂâisa ǂnûi-ais ǀguis ge ǀgâsiba nî ǀoroǀoro !gōsase !hūb di ǂkhamsib ‖aegu. Nē ǂharugu-aon ge mîǁguiba ge ū ǁîn !khōǁôagu tsî sîsenga nî ǂnuwisa nau sîseno !hūǁîna huis ase.
Ministris Surigu ǀGuitikōsib tsî ǀGôakō!gâs dis ge huisenūxūn ǁaupexa N$265 000 maris ǁkhāsiba ūhâna hoa khoese ǂgiǂgo ǁhûi!nâǂharidi Oshikoto ǀKharib khoen nî domdorese ge ǀhae. Nē maris ge !hanaǂgās, !narisarimas tsî !aub!ûi!gâs, !nari!oabadi, ommās, ǂkhari-omn tsî ǀhûhâsi sîsenn !nâ nî ‖guirihe.
Nē a ‖gauǂuisa !harigu ge ‖îgu ǂnûiǂgādi !nâ ǀnai ‖khāsiba ūhâ !nāsa sîsenn ǂnuwis diba ‖în !hūb sâu‖khāsib !nâ ūhâ !harodi !oa. !Hū-omkhâis ge !hūb sâu‖khāsib ‖axasin hîan !nāsa ‖anǂgāsaben !hūb dina !garo!ā ǀkharigu !nâ a ‖axa-ūn ‖goeǂams ǀkha ai!gûgaru tsî i ge ‖nā-amaga a ǂhanu !hū-omkhâisens !âb nî dīǀoaǀoasas kara, os ge nēsa khoen hîa !garo!ā ǀkharigu ûib !gâi tsî omkhâi tama amaga ra kai!âdi ‖ga ‖gôan tsîn !gomsiba a gowaǀî ‖khā. Kai!ādi !ā!khōmaidi ge ǀgaisa ‖goaǂuisa ūhâ nē mâsib !garo!ā khoen di ǂgâxas nē !ādi !âs ǀkha ‖îs ra ǂgui !gao!gao ǂhâsigan nē khoen hîa ǂgâxa tsî hā ǂnaumâidi !nâ ra ‖ann !aroma !oabade ǂgaoǂkhere xui-ao.
Minister Doreen Siokas ge ge mî, !narisarimas tsî !aub!ûi!gâs tsîn ‖khāsib ǀomkhâis diba ūhâsa tsî nēs xōǀkhā !gûkhoen hâ!khain tsî ‖axasina !gâi!gâi!nâ tsî ǀgapi !harodi ai sī-ūs dis tsîna. Siokas ge ao‖guiba ge dī, ǂâis nî ǂnûihesa !hao!nāsi tsî ǀhûhâsib ai !gao!gaosa !aub!ûi!gâs hâra ai, nēs nî !garo!ā ǀhûhâsigu tsîna !hūb sâu‖khāsib !nâ ǂgâxa-ūsa ‖în nî kai!ādi ‖ga doe‖gôaxas di ǂhâbasi-i ose.
‖Khātis ge ministersa ge mî, ǂhanub ǀguri nē sîsenosib mâsib Namibiaba xandom hâba !gâi!gâb ǀkha gowaǀîhō tidesa. ‖Nā-amagab ge nēba !hūb di !gomsib ase nî ǂan!gâhe tsî mâ ǀguiǀguibe !âǀhuru-ao-i hoa-e ‖ î-i !âsa ǀoasase nî mâǀoa. ǂHâbasa i ge a !khō!omgus nî ǂhanub tsî aitsama mâbasenhâ ǂnûiǂgādi tsîn ‖aegu hâsa, ‖îdi tsîn ǀgaisase ǂgâxa tsî sîsenaona sîsenn ǂnuwis ǀkha nî huisa nē ǀoadisidi !nâ hâ !hū‖în ûiga !gâi!gâi!nâs ase.