Aletta Shikololo
KAMANJAB – Babanca babafitelela myanda yemine kuzwelela mwalikiliti zanaha zelishumi kazene, nebaitombozi kulukisa lukwakwa lwa sibaka sasilelezo yalifolofolo sa Etosha, mi neba yahile sinca lukwakwa lwa silelezo ya litou kwamunzi wa Makalani mwasikiliti sa Kunene, kakuba kalulo yakutabela viki yababanca yanaha. Lipiho zacwalecwale libonisa kuli lukwakwa lwa sibaka sapabalelo yalifolofolo sa Etosha lumwa mayemo maswe, mi nelu lumelela lifolofolo ni libata zebuhali kutoba mwasibaka sapabalelo. Sibuabui waliluko la Silalanda ni Bupoti Romeo Muyunda nabonisize kuli lukwakwa lusinywanga kilifolofolo zetuna zeswanasina litou. Naekelize kuli liluko lisweli kusebeza hala kulukisa lukwakwa kono kabunya bakeñisa kutokwa masheleñi.
Muyunda naize pabalelo yakamita yalukwakwa iezwa kibabeleki baliluko, mi kuyahiwa kwalukwakwa lolusakonwi kusinywa kilitou kuezwa kibayahi babaketwa kalipeleko.Mwangambolo ni New Era Muyunda naize naitumela kwamusebezi one baezize babanca, mi naekelize kuli kitaba yende mwamungendenge waliluko wakusileleza limbule. Nasusuelize babanca kuzwelapili kutusa mwakubukeleza limbule, ili kutusa sicaba sanaha mwakutisa misebezi, kutisa masheleñi nikuhulisa sifumu. Babanca nebasebelize hala libima zesupile kulukisa lukwakwa lwa Etosha lone lusinyehile, haneli lukwakwa lwakusileleza litou hala siliba sa mezi, kwa munzi wa Makalani nelu yahilwe nikufezwa.
Viki yababanca nebile teñi kuzwa la 24 Lungu kuisa la 27 mwa Kamanjab mi nendongwami hahulu fataba yakusileleza limbule hala mutomo otwi: “Babanca hamoho kusileleza limbule.” Likius Tjivikua mubabaleli walifolofolo nalumbile babanca kamusebezi one baezize kubatusa kuyaha lukwakwa lwakusileleza litou, naekelize kuli lika kaufela nelibile bunolo. Naize: “Kinto yende kuli babanca baiketezi kuitenga mwakubabalela limbule. Baa kibona baeteleli bakamuso, haiba inge bazwelapili kueza zeswanasina ze, bukamuso bwanaha bumwa mazoho sakata. “Kimuhupulo omunde, mi mane ualabela kwapuzo yakuli kiñi semukona kuezeza kapa semuezelize naha yamina. Babanca babonisize kalulo yende mwakubupa naha,” nekubulezi Moses Shikerete, yomuñwi wababanca yazwa kwa Kavango ya Upa.