Rudolf Gaiseb

Delta ǂAm Skoli skolǀgôan ge Namibiab di !hao!nāsi ǀumisa !kharagagu !hao!nāsi ǂnān ǀkha 55ǁî !Auga!hūsi ǂGaeǀhaos Europab ǀGôan dis hîa “Dâb Europab dib” ti a ǂansas tawa gere ǁgauǂui. Nē ǀhaos ge ǀgū-ae Belgrades, Serbiab dis !nâ ge hâ i. Twaya Siki !hao!nāsi !nans hîa xrat 4, 6 tsî 7 ǀgôana xu a !amǁaresas ge “Waka Waka” ti ra ǂgaihe ǂnāba gere ǁkhaeǁnâ, ‘ǀŌb Namibiab ǂGaob dib ‘ti hoa!nâ-aixase a ǂansaba. Mâ ǁhao-ao-i hoa-i ge Namibiab !khūhâ !hao!nāsib ǀûba ge ǂgaeǂgā hâ i. “Sida ǂâiǂhansens ge !hao!nāsi ǁnaetiga ûiǂuis ai ra hâ khao-oas ai hâ, ǁnā-amaga da ge ǁîn di !hao!nāsi ǀumis tsî ǂnīsasiba sada ǀgôan !nâ ra ǀgaiǀgai ǂgao. Mû!hara da gere !khais ge ǀnî ǀgôan ǁîn !hao!nāsib ǂnān ǀkha ǂangu tama hâsa tsîs nēsa ǀgaisase !âisensa gere ǂgaoǀkhāsa. Sida ǀgôan ge ǂnuwiǁkhāsib !harib ai a ǂoaǂamsa tsîs nēs xa ge !aromahese, ǁkhauǂuisa ge !khō!oa sada !hūba Serbiab !nâ nî ǂnûǁkhaebase,” tis ge Deltab ǂAm Skoli di skoldanas, Celme Richtersa ge mî. ǁÎs gere ǀgonǀgon!gaos ge, skolǀgôan ge kaise ǂgaoǂgao!nâsase tsî ǂnīsasib !hao!nāsib tsî ǁgûsigowagu di ǂhâǂhâsasib dis ǀkha a oahāsa. “Hoan xa !nāǂamsasen ge -îna ǁîn !hao!nāsi ǂnāna ǂan tsî ǁnā ǂansan mâti kurisan ǀkha nî ǀgoragus tsîna ge ǁnâu!ā. !Hūba xu ǂoa tsî !kharagagu !hūgu ǀgôan ǀkha ǁîn ūhâ ǂansa ǀgoragus, !kharaga gowaga ǁnâus, ǀasa ǀhōsana ǂans tsî -ǁîn ǂande khoraǂuis hân ge ǀnî !gâi!gân nēpa xun ge domdorena,” tis ge ge mî. Nē ǁ-âudīb !nân ge 14 xu 16 kōse hâ !hūgu ǀgôana gere ǁhao. “Sida ǀgôan ge kai ǂnīsasib ǀkha -ǁîn !hao!nāsi sarana Europa-îna gere ǁgui!āba tsî buruxa ǂâisa gere ǂnûi-aihe nē îxa !kharaga ǀûga hâ anab hîa Namibiab !hūǁîna gere ǂnûǁkhaeban ǂnamipe. ǀAsa ǁkhauǂuisan ge Nis di !ākhōmai-aoba xu ge !khō!oa !goaxa jurib di !hao!nāsi ǁgauǂuidi !aroma,” tis ge ge ǀamǀam.