TSOAXUBAMS – Ministeris ǂNamipeba !ûi!gâs, Haiǂgās tsî !Narisarimas dis ge ge ǂanǂan, ǁgariǁgarisa ǂhâsib hâsa, Namibiab di dobels ǂharugub ǂnamipe a ǁguisa ǂhanugu nî kō!gâhesa. 

Nē ǁkhawa kō!gâsa ge ǂgaoǂgao!nâ !khais ge, ǂâiǂhansendi hîa !hūb hōǂgāmaris ra ǂkhawu tsî ǁkhāti ǁanǂgāsaben ûiga !gâi tamase ra tsâkhāhes ǂnamipe hâde xusa.

Minister Daniels ge nē ǂâiǂhansende ǀgūǁaes ge Dobels ǀAwemā!nans Namibiab dis ǀkha Tsoaxubams !nâ ūhâ i ǂhanusi ǁkhowa-ams tawa ge dī. ǁÎs ge mîs ge, ǀawemā!nans ǀoasase sîsenxasigu âsa nî ǂâi-aiǂnûi tsî !hūb !nâ ǂgurose a mâisa dīhe nîse xūn ǀkha nî ǂgaeǁgae tsî ǁnās !nâ-ū nē ǂharugub sâuǁkhāsib ǀomkhâis !nâ nî huisa ǁawoǁawo !khaisa. 

Ministers gere ǀgonǀgon!gaos ge, !Amǂgāsa Dana ǂgaekhâib ǂHarugub ǀAweǁguib dib nî !Naniǁî !Hū!nāsi Omkhâisens ǀAweǁguib (NDP6) ai !gao!gaosa !khaisa. ǁkhātis ge !Hū!nāsi Dobels Xoaǁguib di ǂgaekhâis hîa ǁnā ǂharugub !nân tarena ra īs tsî !aorosasigu nēpa hâgu tsîna ra kō!gâsa gere ǁgâi!gâ. 

ǁÎs gere aoǁguis ge, nē xoaǁguib nî dobel ra khoe-e ǁkhaubas, ǂhâbasa ǁkhāsiga omkhâis, sîsenga ǂnuwis, khao hâ kaisa khoena ǁāǁās tsî ǂâuǀoa hâse hāǀaro rase nî mātarehe marina ǀhaoǀhaos hâna aimâi !khaisa. 

“ǁKhā soab ai da ge hâ a !aorosasigu dobels !nâ !gamse ǂgâ tsî ǂoaxa ǁoas diga oresa hōba, tsî ǁanǂgāsabena nî ǁkhauba, !gōsase ǂkhawusa khoena. 

Nē ǁguiǂams ge noxopa nî ǁnâuguhese ī tamase nî aimâihe,” tis ge ministersa ge mî. 

Ministers di ma!hūsa ra ǂkhâ!nâseb ge Fortune Sekgaphaneb, dobels ǂansabeb tsî ǁnās ǂnamipe !nāsa ǂande ǀgoragus !nâ !gâibasensa ūhâba ge mî, Namibiab ǁgariǁgarisase dobels ǂnamipe xoaǁguiga ǂgaekhâi tsî hoa ǂharugu-aon nē !âb !nâ hân nî lesenside ūhâsa nî ǂgaoǀkhā, !gōsase, ǂapaǂoa ra mâsiga ǁkhaes ase. ǁÎb ai!â gere aoǁgui !khais ge, dobel ǂharugub ǀhonkhoena xu nî ǂgaoǀkhāhesa, mâtikō khoen nî sîsenmāhes tsî ǀhûhâsigu !nâ mâ ǀgaugu !nâ nî ǁguirihes tsîna, tsîn nē xūna lesensisa hōs ǂgaoǀkhāse nî isa. 

Dobels ǀAwemā!nans Namibiab dis di aiǂnû-aob, Ben Shikongob ge ge mî, ǂâuǀoasase nē ǂharuguba xoaǁguigu !naka sîsen kais sao ran ai !gâbasen hâ !khaisa, ǂhâbasa huisenxūn, sîsenxa dīǀgaugu tsî ǂōrisa sîsenǁareba ministeris ǀkha ūhâs tsîna. -Nampa