Elelo lodoolopa yaMuthiya ola pitifa omukanda kutya otali ka hanauna po eebashu osho yo omaumbo a tungwa peenhele ehe na omikanda dopambelewa. 

Edi oda popiwa momukandapitifi wa pita Omaandaxa okudja mombelewa yomupopiliko welelo lodoolopa yaMuthiya Martha Andreas. 

Andreas okwa yelifa ta ti elelo lodoolopa ola didilika ovanhu ve likufila eenhele domadu ndele tava dengele po eebashu omanga vamwe ova tunga po eengeshefa davo. 

Onghee okwa ti eshi osha puka molwaashi inashi pitikwa kumuni. 

“Ovanhu vamwe okwa li va lombwelwa kumuni kutya nava kufe po eebashu davo ashike inava hala okulandula omilandu da tulwa po kumuni,” ta ti. 

Okwa kumaida oshiwana opo shi xulife po okulikufila eenhele domadu shaashi osha nyika oumbudi. 

“Ovanhu ngeenge ova hala eenhele domadu nava kwatafane nombelewa yetu ndele tava landula omilandu odo da tulwa po kelelo,” ta ti. 

Okwa weda po ta ti elelo oha li yandje omikanda koshiwana odo tadi ulike kutya omunhu okwa pewa oufemba wokutunga eumbo laye ponhele opo. 

Andreas okwa ti omunhu ou ta ka twikila okuli kufila omadu ota ka pewa ehandukilo lonhumba. 

Okwa kumaida oshiwana opo shi longele kumwe okulopotela ombelewa yavo kombinga yovanhu tave li kufila omadu. 

Okwa weda po ta ti oshiwana na shi kwatafane nombelewa yelelo ngeenge sha hala okupula ouyelele kombinga omayakulo a yandjwa kumuni. 

-fhamalwa@nepc.com.na