Auleria Wakudumo 

Ovakulupe vamwe ova holola eudonai lavo eshi vati epangelo inali wanifa po eudaneko lalo okuwedela opeendjela fiyo N$3 000 omanga vamwe ve wete sha wana manga. 

Ndilimeke Nandjila, omukulupe weedula 65 okwa holola kutya onghundana yokuwedela oshikuvila shovakulupe okwei uda moradio. 

“Tete eshi nda uda opeendjela tai wedelwa, ondali nda hafa neenghono. Onda ka uda vali nai eshi nda uda kutya ohatu wedelwa ko ashike N$100,” Nandjila ta holola ngaho. 

Okwa ti opeendjela ohai kwafa eumbo laye alishe noluhapu ihava wanifa po oipumbiwa yavo yomeumbo. 

Velesmina Katangalo, omukalimo womomukunda Oshinyadhila okwa ti oha longifa okafilinga kaye okufiila oshisho eumbo laye. 

“Ohandi di noutekulu vange veli vaheyali novakwanedimo vamwe vali. Luhapu ohandi li hange ndili meendjo eshi nda landa ekutu loufila ile oshivelelwa mokati komwedi molwaashi oinima ya pwa po,” Katangolo ta holola ngaho. 

Katangolo okwa weda po ta ti N$100 inali wana nokulanda okalaina keeshi meumbo shaashi oko ashike haka denge po omukaa meumbo lavo nokuvafikifa kopeendjela ya landula ko. 

Justina Nghuulikwa okwa  holola kutya epangelo ola li lina okuwanifa po eudaneko olo lali la ningwa komupresidente Hage Geingob eshi a udaneka okuwedela oshikuvila shavo fiyo N$3 000. 

Nghuulikwa okwa ti oku wete omupresidente ali eli mondila okukala ena edilaadilo olo shaashi oikulya oya ninga ondilo meefitola. 

“Ka kele koikulya, ohatu futu omeva etu fye vene nokufiila oshisho outekulu vetu. Onghalo oya ninga ondilo efiku keshe nonghene okamaliwa inaka wana vali,” ta holola ngaho. 

Omanga Tresia Aron okwa holola  kutya okuwete epangelo inali va wedela oshimaliwa shopombada molwaashi la hala vali okuyandja omhito kovana nokoutekulu ovo veli momaumbo vehena oilonga. 

“Kombinga imwe onduuditeko shaashi otwa kala hatu nyenyeta oule wefimbo kutya ounona  noutekulu vetu kave na oilonga nonande vena eedjapo. Paife ondi wete epangelo la hala vali okukandula po omhumbwe ei,” Aron ta ti ngaho. 

Aron okwa ti okuwete sha wapala ngeenge epangelo ola yandje oilonga kovanyasha opo va dule okukala tava kwafa momaumbo neemhumbwe dimwe ngaashi okufuta omeva, olusheno nokulanda oikulya ponhele yokukala ya wilila po ashike opeendjela yovakulupe. 

Paulus Nangolo okwa t iota dimbuluka eshi omupresidente Netumbo Nandi-Ndaitwah eva pula opo veli didimike manga omanga tava tale vali komaupyakadi amwe ngaashi okuhena oilonga, oinamapya nounaimuna, ehongo, ouhaku naikwao imwe. 

“Onda didilika yo kutya ovakulupe vakwetu vahapu ohava di noutekulu ofulundudu. Ondi wete shili mondjila ngeenge epangelo ola kutu ovanyasha vahapu opo va kale hava fiile ovana oshisho,” Paulus ta holola. 

Paulus okwa ti ovanhu nava tale keembing adishe nonghene epangelo tali longo. Okwa yandja oshihopaenenwa shelongo olo la ningwa oshali moNamibia. Okwa ti ei oinima imwe oyo epangelo la hala okutula komesho ponhele yokuwedela oimaliwa ihapu ovakulupe. 

Oshikuvila shovakulupe osha wedelwa N$100 nopaife otava ka kwata N$1 700. 

-awakudumo@nepc.com.na