Auleria Wakudumo
ONDANGWA – Elelo lodoolopa yaNdangwa otali ka tunga opate yokilometa 1.3 moExtension7, keemiliona N$14.5.
Oilonga yopate ei oya patululwa pambelewa pambelewa onghela.
Kansela woshikandjohoololo shaNdangwa komikunda Leonard Negonga okwa holola kutya oproyeka ei oyo imwe yomeeproyeka dakula delelo lodoolopa yaNdangwa odo da tengenekwa di kale da pwa moule weedula nhano.
Dimwe oda hovelwa nale okudja mo2023 noda teelelwa dipwe mo2018. Oproyeka ei otai ka yambula po yo exumokomesho moshilongo.
“Nena otwa patulula pambelewa oproyeka oyo tai ka xumifa komesho odoolopa. Oproyeka ei otai ka xwepopaleka omikweyo doiendifo modoolopa. Itai ka kwafela ashike ovakalimo vomoExtension 7 ashike ovakwashiwana aveshe mOndangwa,” Negonga ta holola.
Negonga okwa twikila ta ti elelo lodoolopa yaNdangwa olina elineekelo kutya otali ka mona omwaalu wovatalelipo vahapu nokukwata ko ovangashefa vahapu okungeshefa mOndangwa.
Oproyeka otai ka kwatela moo pate yeemita 1 300 okudja kombelewa yoikwameni, ya uka keefitola koGwashamba fiyo okeefitola koSun Square.
Oproyeka otai ka kwatela mo yo okutungulula oudopi vopedu moSun Square, okutula omalamba olusheno koB1/ Okapana mopate ipe, otai ka tunga onhele yokukangheka eetuwa dovakwashiwana oshoyo okutunga omalambo omeva okudja koSun Sqaure, oshipangelo shopaumwene shaNdangwa, Nored, noGIPF a uka komalambo omeva oo eli nale konima yoGwashamba moshana.
Omukulunhuwiliki welelo lodoolopa yaNdangwa Ismael Namgongo okwa udaneka ovakwashiwana kutya elelo lodoolopa ola hoolola ovatungi vena owino moilonga yavo notava kwashilipaleke kutya ova longa oilonga tai shambula oshiwana.
Namgongo okwa holola kutya opate oyo tai ka tungwa oya kwatelwa mwaadi tadi tungwa nale (mOluno Extension 1, 16, 24, 25 no26 oshoyo ikwao mOnguta.
Mayola wopedu nomunashipundi mokakomiti kelelo laNdangwa Ester Auala okwa indila ovakalimo opo va longele kumwe navo okukwashilipaleka kutya ova eta exumokomesho mOndangwa. Ovakwashiwana ova indilwa yo va longele kumwe novatungi nomalukanda avo opo vaha ye etungo moshipala.
-wakudumoauleria@gmail.com