!GOMENǁGAMS – Erongob ǀKharisi ǀAwemā!nans ge N$182 miljuns mariǂnûiǂuisa 2025/26 marikurib !aroma go ǁgui-ai!â. Nē mariǂnûiǂuis ge !oabade mās, ǂâuǀoasasib !nâ sîsens, tsî omkhâisens projekdi ai ǀkharib a ǂhabase ǂâisa ǂnûisa ai!hūba ra ǁam kai. 

ǂOa ge wekheb di Donertaxtsēs ais ge nē mariǂnûiǂuisa gere mâi-ai!â soab ais ge Mariǁhōn !Nakaǂnôa Direkters, Daphne Cloetesa ge mî, N$95.9 miljuns tsēsa xu tsēs ǁga hâ sîsenxasigu !aroma a ǂnûǂuisa, ǁnāpas N$7 miljunsa omkhâisens projekdi !aroma hâ hîa. N$49.9 miljuns ge hāǀaro ra ǀkhuwimaridi ai, !gōsase omǁamas ǂnamipe a ǂgaoǀkhāsa maride hui!nâs ase ǂnûiǂuisa, N$26.6 miljuns ge Wlotzkasbaken di omkhâisens projekdi !aroma hâ tsî N$3.6 miljunsa !garo!ā omkhâisens !aroma. “ǂHanub ra hui!nâs ase mā maris ge ǁîs N$59 miljuns ase hōǂgās ase nēpa ra ǂgâxasa, ǂoa ge kurib mariǂnûiǂuis ǀkhas kara ǀgoweǀnōhe, o nēsi 6.6% gu ǀkha a ǀgapisa. 

ǀNî !âgu, ǁîga xu da hōǂgāde ra ǀhaoǀhaobasen gu ge ǀhonkhoe-ai da a xūna ǀkhuwiǂuis tsî tenderdi ǂganǀgaugu (N$1 miljuns), mâǂoa hâ maridi ai ra ǀarosen maridi (N$1.2 miljuns), ǁamaxūde xu ra ǂgâxa hōǂgādi (N$1.7 miljuns) tsî !gau hâ maris (N$14.3 miljuns) hâna,” tis ge Cloetesa ge mî. 

Ai!âs ǁîsa gere mîsa !oab ge māǂuidi !âba, hoan xa a kai maris ra ū hîa a N$52.1 miljunsa. Nē maris ge sao rase a ǀgoraǂgāsa, ǁkhâkorobe !khō!oamaridi (N$44.7 miljuns), GIPF ǁga ǁkhâkorobe ra mātarehe maris (N$5.2 miljuns) tsî nau hâ ǂgaoǀkhādi !oaba mās !nâ di (N$2.1 miljuns). 

“!Aruǀîs ge N$32.6 miljunsa sîsenni ǀkha !gaeǁaresa ūhâ !nariǂoadi (N$4.3 miljuns), huisenxūn (N$12.9 miljuns), !nari!oabadi (N$3.2 miljuns), !gâi ǀgaub !nâ xūn tsî omga ūgaras (N$1.7 miljuns) tsî !norasasib tsî ǁkhaubas !aroma hâ !oabadi tsîna,” tis ge gere gui!ā. 

ǁKhātis ge ǀawemā!nansa ǁanisis tsî ǂkhâ1nâs !aroma N$1 miljunsa ǂnûiǂui tsî N$10.2 miljunsa auton, berodi !nâ a ǂhâbasa xūn tsî om!nâxūn !aroma ǂnûiǂui hâ. 

Omkhâisens projekdi !aromas ge ǂâuǀoa hâ marisa nē ǂnûiǂuisa xu omkhâisens 1âb ga nî ǂhā!kharuhe hîa N$9.4 miljunsa Tatamutsis tsî ǀUes ǁgammās !aroma, ǁhûi!nâǂharide omkhâis !gao N$8 miljunsa, ǀkharisi dana aweǁguib !aroma N$5 miljunsa, Ozondati paipa kurus di N$3.6 miljuns tsî marisihuiba ǁkhāǁkhāsens !aroma ǂkhawusa omaride xu ra ǂoaxa studentna mās ase N$350 000. Wlotzkasbakens di ǂnûiǂuisa N$26.6 miljuns ge ommās, !oabade ǁguiǂuis tsî !gâi!gâisens !khaiga ǁnāpa sī-ūs tsîna nî !khōǂgā. 

“!Garo!ā omkhâisens ge N$3.6 miljunsa sao ran !aroma nî !khōǂgā, !gōsase ǂkhari-omn projekdi, ommās Build Together proxrammi !naka tsî sîsenni dīts gob !aroma maris tamas ka i o ǂûna xawas !âb !aroma, tis ge Cloetesa gere mî!ā