Ongwediva – Onhele yoExtension 12 mOngwediva otai ka longwa mo kehangano lya tseyika nawa nedina VIDU JV ETN, opo i tameke okutulwa omalusheno. 

Omupopiliko wodoolopa yaNgwediva Ottilie Shingenge okwa ti ehangano otali ka andjakaneka omalusheno koExtension 12 aishe. 

Opoloyeka vati oya kwatela mo oukefa vomalusheno, neengodi adishe edi tadi kwafa okuandjakaneka olusheno monhele aishe. 

“Eekondalaka oda yelifa kutya opoloyeka otai ka kwatela mo yoo eepaala dolusheno edi hadi kala momapandavanda da nuniwa okukeelela eembudi, noilonga ya puka hai longwa momilaulu,” ta ti. 

Shingenge okwa twikila kutya opoloyeka ei, nayo oi li ombinga ya dimwe domeepoloyeka edi tadi longwa modoolopa dakula. 

“Otwa pumbwa okueta omakwafo popepi novanhu, opo shi ningile shipu ovakalimo vomodoolopa, unene tuu ava hava kala ve na oifendela yokomwedi,” ta ti . 

Odoolopa yaNgwediva onghee ngaho tai twikile okueta omakwafo kovanhu. 

Neudo ovanhu va koya po200, ova tungilwa eenhele domalukalwa, oo a nuninwa ovamoni voyuuyemo yopedu. 

Natango okwa ti elelodoolopa laNgwediva ola yandja yo omadu kovakwashiwana ava va hala eenhele dokutunga omaumbo. 

Mayola wodoolopa Taara Shalyefu okwa ti nonande ongaho, natango onghee ngaho hava kala va pumbwa edu, opo va dule okupa ovakalimo ava hava kala va pumbwa eenhele dokutunga. 

Taimihaihambo2000@gmail.com