OKANDJENGEDI – Omupresidente gwongundu yoIndependent Patriots for Change (IPC) Panduleni Itula okwa kumagidha oshigwana shi hogolele IPC oshoka oyo ashike ongundu tayi ka eta omauwanawa.
Itula ndhoka okwe dhi popi mOsoondaha molukanda Okandjengedi mOshakati, sho a li a ningi oshigongi shoka sha li sha gongalwa kehwata lyaanyasha mOshitpolwa shaShana.
Oshigongi shoka osha li sha ningwa okuhwahwameka nokukumagidha aakwashigwana ye mu hogolole opo a sindane ehala lyuupresidente woshoshilongo mEtitatu lyomasiku 27 Novemba moka tamu ka ningwa omahogololo.
Ta ti ongundu tayi lele oya ndopa okugwanithila po oshigwana omauwanawa, omanga aaleli taya fudha nawa.
“Swapo okwa ndopa okugandja omahala gomalukulwa koshigwana, aanyasha oyendji oye li momapandaanda, oshigwana natango otashi nyeyeta okumona uuhaku, otamu ka hogolola shike?,” ta pula ngaaka.
Itula okwa li a lombwele oshigwana ta ti mepangelo lye kape na omuntu ta kala kee na ehala lyokuza, aanyasha otaya ka pewa iilonga ya vule okuyambidhidha aakwanezimo yawo.
Ta gwedha po ta ti ngele a pewa oonkondo dhokulela oshilongo shika ote shi kutha muupika moka shi li ngashiingeyi e te shi tula melandulathano onkene aakwashigwana naya hogolole mondjila.
“Ethimbo lyokuthikama nokuninga omalunduluko opaife, oshigwana osha loloka,” Itula ta popi ngaaka.
Itula okwa ti ,ngele a pewa oonkondo dhokulela oshilongo shika kape na nando Omunamibia ta ka mona iihuna oku na okulela nohole yOmunamibia kehe.
Ta ti aagundjuka oyo oyendji moshigwana noye na oonkondo dhokukala oyo taya pangele ngele tashi ya kokuhumitha komeho oshilongo.
“Yangapi yomune kamu na iilonga, amuhe mboka omwa hala okutsikila kuupyakadhi mboka? Ano hogololeni nawa,’’ ta kumagidha ngaaka.
Esiku ndyoka Itula okwa li a pandula omupresidente gwongundu yo-NEFF Epafras Mukwiilongo oshowo omuxwaxwameki Micheal Amushelelo sho ya li ya thiki poshigongi shoka sho ya holola uukwawo wanankali.