ENDOLA – Minista gwiiyenditho Veikko Nekundi okwa ti aaleli oye na okulongela oshigwana uuwanawa opo kaaya nwe po mboka ya sile oshilongo.

Nekundi okwa popi ngaaka esiku kwa li a ka popitha nokutalala po oshigwana kEndola Olyomakaya.

“Otu na okulonga nuudhiginini opo tu kandule po omaupyakadhi ga taalela oshigwana ngaashi ondjala, okwaa na iilonga nosho tuu. Ngele mboka ya iyamba okulwila oshilongo shika onaya ka galuke esiku limwe, ihe oshigwana otashi mono iihuna, otaya geye noonkondo,” ta popi ngaaka.

Nekundi okwa ti, kohi yelelo lyOmupresidente Netumbo Nandi-Ndaitwah otaya ka longa nuudhiginini ngaashi naana e ya lombwele kutya kape na emanya tali thigwa lya londa kekwawo, onkene Aanamibia ayehe oye na okunyanyukwa.

Ta popi kutya ondjala itayi sindwa ngele aaleli itaya longo nuudhiginini. Okwa kumagidha aaleli aakwawo opo ya tsikile okulonga nuudhiginini opo uuwanawa wu thike kukehe gumwe.

“Moomvula ntano komeho Omupresidente Nandi-Ndaitwah okwa ti ina hala nando oosikola, iipangelo oombelewa hadhi gandja omayakulo koshigwana tadhi ka pata omolwoondjila dha teka po nenge dha keelelwa komeya, onkene otuna okulonga,’’ ta popi ngaaka.

Nekundi ta ti, oondjila odhina okukala kehe mpoka pe na omayakulo, ta gwedha ko ta ti, shoka oshi na okuningwa ihe itashi popiwa ashike mokana.

Esiku ndyoka Nekundi okwa pandula oshigwana shEndola sho sha hogolola nawa ongundu yoSwapo, ta ti Endola olya mono ekopi.

“Onde mu pandula sho osho sha etitha ndje nena mpaka oshoka omwa longo oshilonga sha simana, onde mu pa ekopi. Omwa hogololoa nawa,” ta pandula ngaaka.

Nekundi okwa popi ta ti, Swapo oyo onakuyiwa sho osho shoka tayi longo no tayi tsikile okulongela oshigwana sha wo uuwanawa.

Ta ti, kehe egumbo nali kale lina epandela Swapo, nali kale lya dhama moSwapo.

“Nuuna mwa kotha kaleni tamu tsu oondjodhi dhoSwapo, oshoka ongundu ndyoka oyo ashike dhingi moshilongo muka kaakuna we ndyoka tayi vulu okuyi sinda,” ta kumagidha ngaaka.

Nekundi okwa kwashilipaleke kutya omauwanawa ogena okuya.

vkaapanda@nepc.com.na