Erastus Ndawedapo

RUACANA – Ehangano loSanlam Namibia ola yambidida Osekundofikola Ruacana High nomatalashe e li 50 konima eshi kwa li komuhandjo wovanafikola kwa pya omatalashe.

Omatalashe oku li pongushu yoshimaliwa N$20 000.

Neudo okwa lopotwa komuhandjo wovamati kosekundofikola Ruacana High kwa holoka oshiponga shomundilo ndele oinima yovanafikola tai pi po mwa kwatelwa omambo noikutu.

Kape na ouyelele kutya oshiponga osha etwa koshike.

Okwa didilikwa ehangano loSanlam hali yambidida ovanhu ve li momhumbwe yoipumbiwa omo natango hali yambidida eefikola da yooloka nosho yo omandiki ouhaku.

Omukulunhu wehangano loshitayi shoSanlam kOndangwa Shithigona Lukas okwa ti ehangano lavo otali lalakanene okushakeneka epangelo ondjilakati tashi pitile mokuyambidida oshikondo shehongo.

“Sanlam natango ota kwashipaleke okuyambidida tashi pitile pamukalo wokuyandja ehongo nouyelele kombinga yelongifo loshimaliwa koshiwana,” ta ti.

Okwa kumaida omahangano a yooloka opo a yambidide ovanafikola ve li momhumbwe yoikwafifohongo molwaashi otashi tu ovanafikola omukumo ve lihonge nondjungu.

Omukulunhufikola pofikola Ruacana High Nakale Tomas okwa ti ovanafikola itava ka kala vali ve li momhumbwe yomatalashe shaashi paife ova yambididwa.

Okwa pandula ehangano loSanlam molwokuyambidida ovanafikola shaashi otashi kelele ovanafikola vaha nangale pedu.

-Erastus Ndawedapo omunambelewa womauyelele kouministeli wOmakwatafano, Omauyelele Opaungomba koshitukulwa shaMusati.