Auleria Wakudumo 

Ongwediva – David Akuunda okwa waimina elelo lodoolopa yaNgwediva eshi a pewa oshipundi ongaumwe womookansela mOmaandaxa. 

Akuunda omukalimo womOngwediva oo e li omunandjungu mongudu yoIndependent Patriots for Change (IPC) nokwa ya ponhele yaOttilie Haitota wongudu yavo oo a ya kopaliamende. 

Eshi osha ningwa she likolelela kokatendo 10 (1) komalelo eedoolopa konomola 23 yo1992. 

Pefimbo Akuunda ta tambula ko oilonga yaye, mayola wodoolopa yaNgwediva Tarah Shalyefu okwa indila ookansela va longele kumwe okukwafela oshiwana. 

“Elongelokumwe ola fimana mokati kovaleli opo va longele kumwe okukwashilipaleka kutya otwa wanifa po eemhumbwe dovakalimo osho yo odoloopa yetu,” Shalyefu ta ti. Shalyefu okwa holola yo kutya okuana moilonga kaku shi ashike okushaina ombaapila, ashike okuninga omatokolo a kwatela mo oshiwana oo taa dulu okutunga ile okuteya po oshiwana, ovanangeshefa modoolopa, neyambulepo loNgwediva. 

“Oukans ela ohau pula elongelokumwe, ekwatafano nookansela vakwao osho yo okulihongela kuvakweni. Onghene otwe lilongekida okulongela kumwe naave okuyambula po odoolopa yetu,” Shalyefu ta ti. 

Shalyefu okwa holola kutya elelo lodoolopa otali ka tula moilonga okutala ngeenge Akuunda okwe litula moilonga noku na oshiwana komutima moshili. 

-wakudumoauleria@gmail.com