Omupresidente Netumbo Nandi-Ndaitwah Etitano otaka pititha mo aapolisi yeli 1 800 sho ya mana omadheulo gawo, tashi ka ningilwa mokapale kemanguluko mOshakati.
Omugandji gomauyelele gwopolisi yaNamibia Kauna Shikwambi okwa ti, oshigwana otashi hiywa opo shi ka ninge ooihoontali koshituthi-pito shiilyo yetanga lyopolisi iipe.
“Ayehe mboka ya piti omadheulo gawo goomwendhi omugoyi, otaya ka teya sho ya kuna mehuulilo shike ndika,” ta ti ngaaka.
Shikwambi okwa ti iilyo yetanga lyopolisi iipe oya kala noku dheulilwa koosenda dhetanga lyopolisi koPius Joseph Kaunda, Ruben Danger Ashipala oshowo koSimon Mutumba Mutumba.
Ta ti, omumvo gwayi naango etanga lyopolisi olya kutu aapolisi yeli 1 060, mboka yali ya pitithwa mo komupresidente omukulu Nangolo Mbumba mOshakati.
Esiku ndyoka Mbumba okwali a kumagidha aapolisi mboka ya mana omadheulo opo ya longe yi itula mo yo ya shunithe pohi iimbuluma mbyoka yi li pombanda moshilongo.
“Omakwatokoonkondo, omadhipagathano, omayugo osho wo iimbuluma yilwe otayi holoka moshilongo, notayi indjipala kehe siku,” ta popi ngaaka.
Mbumba okwali a kumagidha aapolisi mboka kutya iimbuluma otayi shuna ashike pevi nenge yi hule po uuna taya longo nuudhiginini nomoshili.
Opolisi oya tseyitha kutya aapolisi mboka ya mana omadheulo oya tameke nomunyanyo onga euliko lyoku tyapula oshiindingili shawo, sho ya mana omadheulo gawo oku za pomahooli goTotal kOluno sigo opo Nored, kOndangwa.
“Aapolisi otaya tsikile nomunyanyo nena, Etitatu oku za poTrade Fair mOngwediva po08h00, sigo okondjila yo kuya kOmpundja,” ya ti ngaaka.
Okuza kondjila yOmpundja, otaya ka tsikila sigo oko ka pale kemangulo kOshakati.
Opolisi oya kumagidha oshigwana shi thikame kooha dhoopate opo shi tale iilyo yetanga lyopolisi iipe sho ye shi enditha nawa momadheulo oshowo shoka tayaka ulika.