Gaxu ǁaeba sîsenūhe tama marisâuǂgaes !gôas, marin sîsenūsa ǀgaub di kō!gâsa !nurib, māǂuihe tama mariǁhōn sîsensa ǀgaub !nurigu, hōsa tama ǁamaǂgans ǂkhanin, mâtikō ǁkhāsiban xūna !khōǂgā hâs ǁgauǁgau ǂkhanin tsî !nubusib ǂhâǂhâsa ǂkhâ!nâ ra ǂkhanin dib, hân ge danase ra mâǂoa !gomsin hîab ge Auditer xenerali, Junias Kandjekeba, Omahekeb ǀKharisi ǀAwemā!nans ǂkhanina kō!gâs !nurib, 2021ǁî tsî 2022ǁî marikurikha ǂnamipe a hōǂuina. Nē !nurib hîa Parlements ǀkha nē kurib di ǀKhūǁkhâb !nâ ge ǀgoraguheb, harase ǂâis ǀkha ôa!nâhe tsî ǂhâbasa tsî ǀgau ra dā!harode nî ūhes di ǂâibasens ǀkhab ge ai!â a !gāsa kai !khais ge, mâtis nē ǀkharisi ǀawemā!nansa ǁnā ǁkhāsib !nâ ge mâ tama hâ i, auditer xenerali sîsenaona !hū!âdi di ǁkhāsib tamas ka i o xoakhâib !hū!âdi diba kō!gâs !aroma māsa. ǁNā-amagan ge kō!gâ-aona nē !hū!âdi amabes !nâ hâ tamas ka i o a ǀkhai !khaisa ǁawosasib ǀkha !nurib !nâ ge !khō!gâ ǁoa i. ǀNî mâsib hîab Kandjekeba ge mîb ge, N$581 700 di mariǂnûiǂuis hîa mâ marikurib hoab !aroma ǁkhā !gôab ai ge ǂnûiǂuihe hâ is ge N$361 296 ǀkha 2021ǁî kuriba !kharu tsî 2022ǁî kurib !nâs tsîna N$500 005 ge !kharu hâ isa. Māǂuidi ge ǂnûiǂuisa marisa 2021ǁî kurib !nâ 85% ǀkha !nā tsî 2022ǁî kurib !nâ 62% ǀkha ge !nā hâ i.
Marisâuǂgaes ǁgauǁgau ǂkhanin ge 31 ǀKhūǁkhâb 2023 tsî 2024 ǁî marikurikha !aroma noxopa māǂgāhe tama ge hâ i, !nuriba dītoas !aroma. Noxopa ge kō!gâs ǂkhanin disa xu a ǂoaxa !khais ge, marisâuǂgae !gôara hîa ǀkharisi ǀawemā!nans di ǀons !nâ hâra, N$3 003 279 ǀguis !nâ tsî naub !nâ N$134 142 ǀkha surudeb !nâ hâse ra ge mâs hoas hâ!nâ marisâuǂgaes xa a ǂan!gâhesa, ǁnāti ī !gôadi amabes !nâ hâsa, xawe ra ge hoara hîa ǀkharisi ǀawemā!nans marisîsenūs ǂkhanin !nâ ǂoaxa-ūhe tama ge hâ i. ǀAwemā!nans ge kō!gâs !aroma a māǂgā ǂkhanin ge kai xūn projekn di marisâuǂgae !gôas !nâs N$10 966 628 marisa hâ !khaisa, xawes ge marisâuǂgaes tawa ge dīhe dî!gâsa !oa ǁnā marisâuǂgaes !gôasa gaxu ǁaeba sîsenūhe tama hâ tsî ǁîs !nâ N$3 784 ǀguisa hâ. Nē ǂansa !oas ge N$10 962 844 a !nubu māǂgāsa ǂansa xu. ǂGui!nâgu !nubusin ge māǂgāsa ǂkhanin tsî amab ǁaegu ge ǂherexa. !Nurib ai!â !khōǂgā hân ge marisâuǂgaedi ǁnā marina ra ǂan!gâ, xawes nēsa ǀawemā!nans !nurib !nâ !khōǂgāsa tamas, ǁamaǂgansa xūn !nâ hâ !kharagagusib, ǁamaǂgansa xūn ǁgauǁgauǂhawen kō!gâs !aroma māǂgāhe tama is tsî projekn !aroma a ǂnûiǂuisa marin di !gûǁare tama is hâna.