Katengo ka makwambuyu kanyatezi mulelo wakuimulula milao yebeilwe kimubamba omufubelu, mwapatalazo ya bu 16 yaliketo za za katengo ya 2024 viki yefelile. Keto yene zibahalizwe ki likwambuyu wa mañusa ni zwelopili ya kuambolisana Modestus Amutse, ilela kuzwisezapata sifumu ni kumbweshafaza makete alimunanu mwalibaka zekungulezwi kwatuko. Katengo ka makwambuyu kafitisize mulelo wapatisiso ya lilimo zepeli kubona kuli kuzwisa mubamba kukatahisañi.

“Patisiso ika lemusa milelo yakutahisa libaka mokusina matuku mwalibaka zelemuhilwe, kungelela cwalo ni Mangetti, Karikubis, Tsumkwe, Mangetti ya Mutulo, Mangetti ya Wiko and Onalusheshete, Ombuga, Omutambo Maowe ni Sesfontein,” nekubaleha temuso ya Katengo ka makwambuyu.

Patalazo yeo itaha kulatelela muzeko oli mwakhuta kulwanisa mubamba omufubelu, one ukwaluzwi ki muetapili wakatengo ka Affirmative Repositioning Job Amupanda.  Ubulela kuli mubamba una ni ketululo mi ulwanisana ni mutomopuso wanaha, kusinyasinya liswanelo za bayahi banaha Namibia, nikutibela kuzamaya kwabatu ni limunanu. Lukwakwa nelukile lwa ezwa sapili kutibela kuambalakana kwa matuku alimunanu mwahala mutulo wanaha ni naha kaufela.

Amupanda ubulela kuli mubamba usinyasinya litukelo zabatu banaha Namibia, mi uyemela nako yabukoba. Nakile akwalula muzeko kasilimo sa Kandao 2021, mi ukupa khuta kunyatela kuli lukwakwa luloba mulao, nikuli kufiwe taelo yakuli luzusiwe. Hape ubata kuli mubuso uhaniswe kuno amuha batu nama yezwelela mutulo wanaha Namibia. Muzeko wahae ulwanisizwe kimubuso ni bazamaisi babañwi, kungelela cwalo ni likwambuyu wa njimo, mezi ni cafazo ya mubu Calle Schlettwein.

Ili yabulela kuli lukwakwa ki lwabutokwa mwakubukeleza mayemo anaha Namibia akuba naha yesina butuku bwa taku ni mulomo, ili taba yabutokwa mwakulekisa nama kwa misika yekwanda’ naha. Nabulezi zeo mwabupaki bwana tambekile kwa khuta mwa kweli ya Njimwana 2023. 

Kono, nalumezi kuli lukwakwa lukwalela babali kwamutulo wanaha kwa misika yeminde, mi naize milelo ya kuzwisa lukwakwa ina nikunyatisiswa hande kakuli ku uzwisa feela kukona kutisa butata.