ǂGui surigu !kharu!nâ hâse gu ge dâu ra ǁgamgu Kavango !Āb diga omaride ǂûma, !hanaga ǂnâ, omde !anu!anu tsî unis ai karasasiba ǁnā ǀgaisa sores ǀawas dis !oagu ra mā. !Nubuse mîs aib ge nē !āba khoen tsî ûitsamaxūna !khōmai hâ.

Xawe nēsi hâs ge, !gâi tama xū-i danasa ra ǀhōǂuisa, tsî nēb ge a ǁō hîa ǁaupexa mâ ­ǁaeb khoe-i !āba ra sîsenūb ai hā ra !gubu-amse. !Aromas ge ǁnâsegu (crocodiles) ǀgūse ǁgammi !naka sâusen tsî ǀhûhâsib khoe-i hîa ga ǀgū-e ra ǁnāǂam !khaisa. “Oms tawa ǀgui ta nî hâs kara, o ra ǂâibasens ge, !âs xa ta nî ǁōsa.

Tsî nau ǀkhāb ai tā !āb !nâ nî ǁgôas kara, ob ǁōba !âu te hâsa, ti ûiba tā ǁkhōǁkhō ra sī-ū amaga. Ob ge ǁgâus ai hâs tsî !āb !nâ sīs tsîra hoara ǀgui ǀamsa !khōǂgā hâ,” tib ge 35 kurixa Augustinus Murongab hîa ǁau!khōsa xu ra ûiba ge mî. ǁÎb tsâsiba ra ǀgonǀgon!gaos ge, ǀgūǁaes ge Rundus !Ās ǀAwemā!nansa a māǂui !khâikhoms, in khoena !āba xu !nūse hâ, ǂauna khoen ûiga ǁnāpa ǁnâsen ǁnāǂamdi !nâ-ū ra ǂoa!nās disa.

Nē kurib !nâb ge ǀgapi !gôab ǁōga a !nurisa, ǁnâsen xa ûiga ra ū-aihe ǀhûhâsib khoen diba. ǂGui khoen hîa Kavangob !āba xu kuriga ûi !goaxan !aromas ge ǁîba xu ǂgae-oasensa supu tama hâ. Kaise a tsûsa tsî īǁoasa ǁguiǂams ase ī. “Supu tama hâ mîǁguib ge nē ge ūheba, xaweb ge nausa sida !aroma ǀasa xū tama hâ. Kurigu !oede da ge ǁnâsen ǁaegu ǁan hâ. Xawe, tare-e da nî dī sida tsēsa xu tsēs ǁga ûis !aroma nē !āb ai !gâbasen hâ mâsib !nâ? Tita ge !āb !nâ ǁauna !khō tsî ra ǁamaxū, !gâi ûiba ǁawoǁawobasens ase,” tib ge gere mî. ǀNîkhamikō kilometerga Rundus aiǂoas ǀkhāb ai ǁîs haka ǀgôan ǀkha ǁan hâ, 38 kurixa Da Silva Theresas gere mîs ge, ǁîs ǁnā ǁkhōǁkhōsasigu nē !āb !khōǂgā hâga ǀū tama hâsa, xawes kaikhâis âsa xu nē !āb !nâ ǀgui ra saraǁā !khaisa.

Mâpa da nēsi ra ī, ti oms tawa da ge ǁgam-am-e ūhâ tama hâ tsî ǁnāti ī ǁ­gam-ams hîas ge ǀawemā!nansa ǀhûhâsib sîsenūs !aroma hā a mâis ge ǀnî tsēdi ai ǀgui ǁgam-e ra ūhâ, tsēs hoas ose. Internets ai a hōsa !gôagu ra mîsa !oas ge Ministeris ǂNamipeba Kō!gâs, Haiǂgās tsî !Narisarimas disa koro khoen ǁōgu tsî !nani tsû-ain ǁnâsen ǁnāǂamde xu hâna, Kavangob Huriǂoas tsî Kavangob Aiǂoas ǀkharikha !nâ !Khanni 2024 dib tsî !Khanǀgôab 2025 dib kōse !nuri hâ.