Keetmanshoop kuna hara kuvatulirapo veta zokugava novili omu navagenda vantu 

Keetmanshoop kuna hara kuvatulirapo veta zokugava novili omu navagenda vantu 

Suzith Tjitaura 

Keetmanshoop-vatungimo moKeetmanshoop kavageve magano gawo asi vaporosi vaNamibia vatulisepo veta zokutanta zokutanta asi vantu siruwo musinke navagenda ntani navapira kugenda ntani vatulisepo mafano ntani nositasi zoukpira kukara asi kwakarererapo vavhure kukwata yitodi eyi ntani nanayinye eyi vana kugwana asi youkorokotji modoropa. Vatungimo siruwo sepongo lyawo kumwe novaporosi moune kapwire, vantu kavatente hena asi vaporosi vahundireko vakwayita vaNamibia vagende moyitarata yomodoropa yipo vagusepo ukorokotji ou. 

Mukurona govaporosi momukunda gwa//Kharas komisare Marius Katamila, katente asi simwe esi sina kuretesapo vantu ava wotumbunga vakare moukorokotji, epangwe ntani omu nye vene vana kurwana morwa kuna kuligwanekere pomavango gokurandesera, nkenye ogu asi evango lyendi. ‘’ Ose kuna kurugana momunene kumwe negwanekero novaporosi vaSouth Africa omu tuna kara asi twahepa kuhagekesapo epangwe eli lyahawiza mosirongo setu ndi modoropa zetu. 

Konyara kehagero lyaSikukutu dogoro mokatji kokwedi kwaSindimba, ose kwakwatako epangwe lyokusika komulyo goyimaliwa N$8 zonomiliyuna eyi vatambeserere yiwize moKeetmanshoop. 

Ose tuna mupumbwa one wonkarapamwe mukara meho getu nomatwi getu, morwa ose kapi twakara nkenye oku kevango monovili odo 24hours, yimo ana kutanta komisara. Katamila katente asi mambo govantu ntani mavango gonongesefa kuna kugateza vawidi, omu yina kara asi kuvaka kuna kuhoroka nkenye ezuva. 

Mokuturapo nye novili, Katamila katente asi kutura novili ntani kuzigida vakwayita vakare mononzira Namibia sirongo sokumanguruka vantu kwavapulisira kugenda. Esiliko novili kwayipulisira tupu mbongarero zanavenye vatulisepo veta ozo. ‘’ NDF ntani vaPorosi kwakara noyitumbukira yokulisiga siga, twayimwe siruwo soCovid-19 elipakerero lyangoso kapi lyarugene, ose simpe kuna kara noudigu woCovid-19. ‘’ Nye nampili ngoso naigava udigu wangesi komukurona gwange,’’ yimo ana kutanta. 

Pasitore Gordon Titus katente asi vahepa kutulisapo kambunga kovagara vagave ehungo mwenyo koyitodi oyo, yipo asi vagwane nawa nawa asi yinke ayivaninkisa varugane yangoso. 

‘’ Ose nare twatameka kuhuyungisa vamati ava, makura twahundira vaporosi mazuva 21, makura konyima zoyo ntani ngatutara asi yinke yokuvhura kurugana. Ose tuna hara kugwana nawa nawa asi yinke nawa nawa ayivaninkesa valihamesere melikwamo lyangesi. Yimo ana kutanta Titus. Yimwe eyi kavatumbwire vatungimo kuna kara vanonagona wokugendagura mononzira domodoropa, nombaha novili dado, kuzumbanesa nodombapira doyirapotwa, ntani kuruganesa yikorwesa nepangwe mokatji kovasesu gona.