KATIMA MULILO –  Khuta yetalima mizeko yamisebezi nefutuzi kulilimaniswa kwamuzamaisi watolopo yaKatima Mulilo Raphael Liswaniso, kupatalaza kuli kulilimaniswa kwahae nekufosahezi mi akutisezwe famusebezi. 

Mwakatulo yene filwe Labulalu, muatuli mwalitaba zamisebezi Bester Maiba nabeezi kwatuko kulilimaniswa kusina tuwelo, mi nafile taelo yakuli katengo katolopo kalife Liswaniso masheleñi kaufela ana swanela kufumana mwanako yana lilimanisizwe famusebezi.

Zeo kaufela lizwelela la 28 Yenda 2025, Liswaniso hane alunduzwi fasitulo sahae, kalikakalezo zakamaiso yetezi mafosisa ni bulyangelino, zengunganywa kwakucinca mubu ni limotikala. Kulilimaniswa nekukilwe kwapetwa kimuyemeli walikwambuyu, kasamulaho likwambuyu walikolo la zwelopili yalibaka zalitolopo ni matakanyani James Sankwasa nalunduzi kamaiso yakatengo katolopo kuli kuezwe lipatisiso. 

Zeo nihalili cwalo, milatu yeo Liswaniso nalimbiwa nesika patalazwa, kacwalo aiketela kulwanisa kulilimaniswa kwahae mwakuta yetalima mizeko yamisebezi. 

“Afilikanyizwe kikulilimaniswa, mubilaeli nasundilwe kukwalula muzeko mwaofesi yazebona zamizeko yamisebezi, kuli kulilimaniswa kwahae kubeelwe kwatuko,” Maiba nañozi mwakatulo yahae. 

Bayemeli baLiswaniso ili Puteho Kangumu ni Bernard Tjatjara nebaize kulilimaniswa nekuloba mulao kakuli neku ezizwe kusina lipatisiso kapa muzeko wasimubuso.

Nebabulezi hape kuli muyemeli walikwambuyu nasebelisize maata ahae kamafosisa, kakuli konji bayemeli bakatengo katolopo kona babana ni maata akulilimanisa muzamaisi hakutalimwa Mulao waKatengo Katolopo. 

Muyemeli wakatengo katolopo Kaijata Kangueehi, mwamanzwi ahae naize likwambuyu nana ni tukelo yakuketa muyemeli wahae kuzamaisa katengo katolopo, mi kulilimaniswa kwamuzamasi nekulatelela milao yeliteñi. 

Nihakulicwalo Maiba nafumani kuli zene ezizwe kikatengo katolopo nelitezi mafosisa. 

Hane akupilwe kualabela fataba yeo, sibuabui wakatengo katolopo Chrispin Muyoba, naize habasika nyatisisa kale katulo, mi baka biza mukopano kusinganyeka kuli katengo kaeza cwañi.