KATIMA MULILO – Sikiliti sa Zambezi nesibile ni mafelelo aviki amatelele amukiti wapaseka amande nihakuna ni muunda, nekubulezi yomuhulu wasipokola mwasikiliti sa Zambezi Andreas Shilelo. Mwangambolo ni New Era Shilelo naize sikiliti “nesikuzize hahulu” mi nekubile ni lipiho zesikai feela zenyinyani. “Nekubihilwe lipiho zenyinyani ili zesi zemaswe hahulu. Neli kafa ni kafa, kutuba mandu ni likanyi kwamanwelo abucwala, kono hakuswani ni mwalinako zakwamulaho,” nabulezi.

Shilelo naize nekusikaba ni likozi zetuna zafamukwakwa zene bihilwe, kwanda lipiho zabane bakwaeza bakozwi nibabasina mañolo abukwaezi. Naize kukuza nekutisizwe kikuli buñata nebaile kwaminzi yabona mwapumulo yapaseka kusiya tolopo mukungulu. Kono Shilelo naibilaezi hala kusinyeha kwamikwakwa mwasikiliti, sihulu kwaKongola. 

“Mukwakwa waluna hauyo hande. Luna ni misima yemiñata mwamukwakwa, sihulu kwaKongola. Kimukwakwa otisa sinyehelo kwamawili sihulu alimotikala zenyinyani,” nabulezi. Nafile mamela kuli misima isweli kuyanduluka bakeñisa limbayambaya zetuna mi ukona kutisa likozi zetuna haiba inge usa lukisiwi. “Sepo yaka kikuli Likolo la Misebezi ni Linzila lisweli kuitukisa kueza sesiñwi, kakuli lukaswana lwalatehelwa kimioya haiba inge kuzwelapili cwana,” nabulezi.

Hala mayemo amuunda, Shilelo naize hakuna mafu abihilwe angungahanywa hahulu kwamuunda. “Kutisa cwale, muunda hausika tisa kozi. Sicaba bane bapotolohilwe kimuunda nebapulusizwe, mi balisani ni likomu nibona neba tutile kusina kozi,” nabulezi. Naize mezi azwelapili kupahama hainyani kono mayemo abonahala kuombalala.