KATIMA MULILO – Bayahi ba silalanda sa Sibbinda mwasikiliti sa Zambezi bapila mwasabo, kasamulaho likubu, litou ni litau nelibonwi liyambaela mabapa ni minzi. 

Balimi mwasilalanda sa Sibbinda babulela kuli kuyambaela kwalifolofolo nekukalile kasamulaho amuunda one utisizwe kimezi apula ane atibisize minzi yeñwi mwaSibbinda, kutisa kuli lifolofolo liyambaela kuzwa kolipila.

Yene ili membala wandu yamilao ni muyemeli wasilalanda sa Sibbinda kwamulaho Mickey Lukaezi nanyatezi lipiho zeo. Lukaezi naize la 27 Yowa sicaba bakala kubilaela bamano bona likubu zepeli lifita mabapa ni hae mwaSibbinda. “Taba yeo nebihilwe kwalikolo la Silalanda, Mishitu ni Bupoti, ili lene lilumezi babeleki kuli bato leleka lifolofolo zeo,” nabulezi.

Kono nihane balikile kuleleka lifolofolo, bayahi baSibbinda bazwelapili kubona likubu mwasilalanda. Kwamakalo aviki yefelile, kubu yeñwi nebonwi ipatalala mwahae ilibile kwanuka ya Kwandu. 

Kubateni kwalikubu kutisize sabo kwabayahi baSibbinda, ili babafumaneha libima zemashumi asupile kuzwa nuka ya Lyambai ni libima zemashumi asilezi kuzwa nuka ya Kwando, ili kolifumaneha lifolofolo zeo.

“Kilwapili mwalitaba zakale lubona litau lizamaya mwalikwata zetuna. Halutalima mutala neluboni kuli neli zeñata, mwendi neli zesupile, zelobapeli kapa zelobanwi,” nekubulezi Lukaezi. 

Balimi mwasilao babulela kuli lifolofolo zeo halisabisi feela sicaba kono litisa lisnyehelo kwa masimu ni limunanu. Mulimi yomuñwi yapila mwaSibbinda, Simamezi Tuombale, naize bayahi bamunzi nebazusizwe kilinja zene huhula Labubeli busihu, habatozwa bato lemuha kuli kubu nefita busihu.

Lamubulo, “nekuna ni litou mwasimu yamuzwale waka. Nelisinyize licalano zecwale kambonyi ni mundalangwe,” nekubulezi Tuombale. Nabulezi hape kuli balisana sebasaba kuisa likomu mwamushitu bakeñisa litau ni litou zeyambaela. Muunda niona utisize butata. 

Lukaezi ubulela kuli lipuli seli mela litombo bakeñisa kuca matali akolobile, mi likomu lina ni butata bwa litaku bobutiswa kisileze. Kwalifolofolo zanaheñi, sicaba hape batalimana ni kulumiwa kilinoha bakeñisa muuunda. 

Lukaezi naize cwalecwale batu bababeli nebalumilwe kilinoha mi nebamatiselizwe kwasipatelanyana sa Sibbinda. “Nebailo alafiwa kapilipili, kalitohonolo nebapilile,” nabulezi. Kubata lituso zasicaba nikona sekuli tata kakuli mikwakwa yeñwi ikwalilwe. 

Mukwakwa mwahala Sibbinda ni Linyanti ukwalilwe. Bayahi babulela kuli bakuli bana nikuzamaya nimautu kuliba kwa sipatelanyana. Kakuli limotikala halifiti kwateni.