Ministera goyipangura novarugani Fillemon Wise Immanuel momandaha karuganesere yimaliwa yokusika ko N$22 000 kayitundire melimba lyendi arandere varugani wominsiteli wokusika ko 100 nyama zokapana valye muzuhwa morukanda rwaKatutura, kukwama apa nye kavakere nosigongi esi kavazegwilire mvhura zompe. 

Momutjima nye gwendi mokugusa asi varugani vahepa kukalya kapana ko single Quarters age kakere negano asi vahepa kuvatera vantu ava vana kara mosirongo vavarande ntani kuninkisa nye umpitisili ukare asi una gwanekere kumwe novantu. ‘’ Kapisi vayiture momukaro asi awo kuna kuyagwanekere tupu novakwawo, vahepa kuyimona age kuna kulikida asi mpitisili govantu ,’’ yimo ana kutanta Immanuel apa vana kumupuragera. Age kagwedereko asi umpitisli wahepa kuulikida kwanayinye eyi ono kurugana. ‘’ Umpitisili kapisi asi moyigongi tupu yomo nomberewa, nye wahepa kuulikida kweyi ono kurugana nomutupu wakara.’’ 

‘’ Ntani twahepa kuyimona asi ame kuna tokora kuyagava ekwafo lyange mokuyaranda positanda eyi ayikara nkenye apa asi kapi atuyvatere ava vana kukambekako koekonomi lyetu, vantu vetu vana kara asi wopokatji ndi wontateko kuna hepa mbatero,’’ yimo ana kutanta ngoso. Apa nye katumupulire asi yingapi ana ruganesa, ministera kalimbwilire pomuhowo asi oyo, yanyamwange. 

Konyima age kageve asi aruganesa yimaliwa yokusika koN$22 000 mwanayina tupu, yimo ana kutanta. Sinzi sovarugani konoministeli dokulisiga siga kavayakere pomuzuhwa gwangesi. ‘’ Awo kavakere vana hafa unene, nokutanta asi kuna kumona asi nawo nani mulyo, ntani nani nawo vamwe vana kukambekako kuwoko. 

Eyi yiyo nye vana kumona mulyo unene. Age kagwedereko asi ministera zoyipangura, ezi zakara hena asi kwakererepa yirugana, ntani kutulisapo yirugana, vahepa nawo kulikida nokuvatera vaNamibia vakara kwalikuta pwavene. 

Nkumbu zawo; 

Apa nye sayitunga zaNew Era kaziyasikirepo positanda saSingle Quarters, wokurandesa kapana navenye tupu vana kumenyamenya, nokupandura ministera kweyi ana kuyavaranda. Vamwe katu vamwene tavamumorora , ano ava vamwe awo kuna kuvatera varandi vawo, omu vana kulikida ruhafo rwawo. Gumwe gokurandesa positanda, Simon Andreas karandesere nyama zokusika ko N$3 200 kombunga ozo kazitundire koministeli. ‘’ Ame nina hafa sili unene, kumona nompitisili detu kuna kuwiza vayarande nyama kumwe novarugani wokoministeli zawo, hawe vana yatuvatere momu n e n e . Os e tuna hafa.tuna hara vakatengwireko hena oku kwetu,yimo ana kutanta. Vamwe wokurandesa nawo kavatente asi nawo vana gwanenemo uwa, omu vamwe kavagwene yimaliwa yokusika koN$400 dogoro N$1 800 mokurandesa tupu. Ano vamwe varandesi, kavatente asi eyi kapi ayihoroka omu vakurona vepangero vawize vayadingure positanda, nosivaro sovantu wovanzi ngesi. Gumwe nage gokurandesa , Johannes Stefanus, ogu kakere asi kuna randesa nyama zokusika ko N$1 800 nage kageve rupandu rwendi kwaministera. 

‘’Ame nina hafa kweyi ninagwana nayina varandi omu ministera ana yaranda nyama pwange. Age gahepa kuyirugana ngorooro,’’ age kuna kuhuyunga eyi oku tamenya menya. ljason@nepc.com.na