OSHAKATI – Aakiintu aagundjuka osho wo mboka ye li mepipi lyopokati ya hombolwa nenge inaaya hombolwa otaya kumagidhwa ya ka topolelathane omalongo osho wo oonkundathana kombinga yonkalomwenyo. 

Oshigongiilongo shoka otashi ka kala ko momasiku 14 gaMaalitsa nuumvo, pehala tali ithanwa Rochas Hotel mOneshila, Oshakati. 

Omukwatelikomeho gwoshigongiilongo shoka Salimi Gerhard okwa ti, omupopi gwesiku a simana ota ka kala ngoloneya gwoshitopolwa shaHangwena Kadiva Hamutumwa. 

Ta ti, otaku kala wo aapopi ya gwedha po, ngaashi Victoria Haihambo, Martha Nekwaya, Julia Kadhikwa osho woRegina Haikali. 

Gerhard okwa ti, okatekete oke na N$100, naakuthimbinga otaya ka pewa uukunwa oku ya taamba ko. 

Omuzalo gwesiku otagu ka kala omalwaala ga tsa. “Onde ya po nomalongo gokuhwahwameka nokuyambula po aakiintu oshoka onda ndhindhilike ompumbwe ndjoka maakiintu konooli. 

Gerhard okwa ti, ongomukwateli komeho gwooproyeka dhi na sha nomayambulepo mokati koshigwana, oha longekidha omalongo kehe mpoka ta iyadha, nelalakano lyokuhwepopaleka onkalo moshigwana. 

Ta ti, aakiintu oyendji oya sholola monkalamwenyo, yamwe oyi idhina e taya kanitha ongushu yawo nokuli. 

“Sho osho shoka nda hala tu hanganeni e tatu kundathana, nokupukululathana nkene tu na okusinda shoka tashi tu thindile kongudhi nenge tashi tu teya po,” ta popi ngaaka. 

Gerhard okwa tiaakiintu yamwe oya kutha omatokolo inaaga uka omolwomatompelo ge li po, ihe shoka otashi pukuluka ashike uuna ya mono omalongo nomapukululo ge li mondjila. 

Gerhard okwa ti, kuuyelele wa gwedhwa po ota vulu okumonika konomola 081 3151 237. –vkaapanda@nepc.com.na