Yene ili mupokola nalengilwe lilimo zemashumi amabeli kazeketalizoho ki Khuta ye Pahami ya Windoko viki yefelile, kakubitelela mwana hae wakuipepela yanana ni lilimo zelishumi kazeketalizoho. Claudia Claasen nalengile muuna walilimo ze 54, yasa konwi kutungululwa kabaka la kubukeleza siezwa, lilimo zelishumi kazelobapeli za kubitelela, ni zesupile zakufosa ni membala walubasi. Claasen natolokile kezo ya kubitelela kakuba ye situhu, ye shubula, ni ye maswe yeo mutu yomuñwi akonwa kuezwa, nazwezipili kutalusa kuli: “Kungelela cwalo ni likezo zeñwi zakusomana isi katumelelano, iwela mwa kalulo yakuloba liswanelo za mutu mi haikoni kutatululwa kusa bilaezi kuli ya eza taba yeo utomelwa lilimo zekai.”

Naekelize kuli sicaba si itekezi kuli likezo za bubangoki mwa mabasi ni kubitelela banana litatululwe ni kuyefimiswa. “Liswanelo za banana libukelezwi mwa mutomopuso wanaha, mi kubitelela mwanana, ki kezo ye situhu hahulu kacwalo likhuta lina ni kufa likoto zebukiti zeyelela ni butuna bwa likezo zecwalo,” nekuhatelezi muatuli. Nabulezi hape kuli mwataba yakufosana ni membala walubasi, khuta nefumani kuli nasika sinyasinya feela lilato ni sepo ya mubilaeli, kono namufile mulwalo kabaka la kubitelelwa mi nana ni kutalimana ni kashwau ni butuku mulwalo hane unani kusinyiwa. Muatuli nabulezi hape kuli yanyazwa napalezwi kufa bupaki kanako yamuzeko kuli sene simu ezisa taba ye cwalo ki sifi. 

Kamaikuto amuatuli, khuta imwa simbwi kuli yanyazwa, yene ili mupokola, nasa bilaeli ni mulao kapa buiketo bwa mwanana. Naize nasika bonisa kuinyaza ili taba yesupeza kuli haitumeleli mafosisa hala taba yana ezize. Muatuli naize kubonisa fokusweu kuli lizwalo la ya nyazwa haliyeleli ni maikuto asicaba. Naize zeo litomolwa mwa bupaki bone butile mwa khuta hala silikani sa hae ni banabahae. “Hakitaba ye itekezwi kuli mushemi ufa mwanahae bucwala, kono yena naeza cwalo. Hape napihelela kuli hakubilaezi kuli bana bahae ba ba sizana banaluleya bapumula mwa mumbeta wahae, ili taba yene ezahala kamita,” nekubulezi muatuli.

Nazwezipili: “Mwa maikuto ahae mwataba yene ezahaezi kwa Oshikango, nalekezi mubilaeli bucwala, ili taba yenyatela taba yekomokisa ya linzila mwa utela bana.” Nazwezi pili kutalusa kuli bana baswanela kutalima kwabashemi babona kubasupeza nzila ni silelezo, kono mwa taba ye, ndatahe nafutulezi mubilaeli lika. “Kwanda kuli asileleze mubilaeli, yanyazwa nalobakile kukena kwa mwanahae wamusizana mi likezo zahae neli tisize kolofalo ni butuku bosakonwi kutakulwa. 

Mubilaeli ukazwelapili mwabupilo bwahae kumangana ni kusheununwa, mihupulo ni kuholofala maikuto,” nekuhatelezi Claasen.

Kakufeleleza naize zeo kaufela halibeiwa fasikala iswanela kuba sikuka sakufa koto yeswanela. Ya nyazwa nayemelwa ki Palmer Khumalo, kataelo ya ofesi yetusa kuyemela batu.