Muuna walipisinisi mwa Katima Mulilo uisize muyemeli (meya) watolopo ya Katima Mulilo mwakhuta kuli amulife masheleñi alikana N$978 723. 08 kasamulaho akutiba mukiti walipina. 

Muuna walipisinisi Peter Chola Musonda ni kampani yahae Zanami Investments CC nena ni mulelo wakueza mukiti walipina kwamuyaho wasicaba wa Ngweze la 23 Ñulule 2023. Kalibaka leo baliba kwa Katengo Katolopo ya Katima Mulilo kamulelo wakubabaza, ni ku eza kezahalo mi neba kupile tumelelo kwa katengo katolopo kusebelisa muyaho wasicaba mwahala 30 Njimwana ni 6 Ñulule.

La 8 Ñulule, katengo katolopo kazibisa Chola kuli tumelelo nenyatezwi kusina tifo kono kalibaka feela lakuli una ni kukenisa mandameno asibaka, hamoho cwalo ni kulukisa litaba za mulilo wamagesi ni zakufasulula zene lyangani kwa muyaho. Chola kalizazi leliswana añola liñolo kukupa pampili yemulumelela kueza mukopano wasicaba kuli aeze mukiti walipina, kwa Mapokola banaha Namibia mi alifa litifo zene tokwahala. Nihakulicwalo, nihane alikile kubuza kuli liñolo lahae lizamaya cwañi nasikafumana kalabo.

 La 22 Ñulule 2023, lizazi leli tatami leo mukiti noswanela kuezahala, Chola alemuswa mwamulomo kimupokola yomuhulu yomuñwi kuli hana kufiwa liñolo la kueza mukopano, nikuli mukiti uswanela kuyemiswa kakuli John Ntemwa, meya, natisize liñolo kulwanisa kezahalo nikuli Mulauli wasipokola sanaha Joseph Shikongo namufile taelo kubona kuli mukiti usi ezahali, mi ahana kumufa liñolo la kukubukanya sicaba.

Chola naize nasika fiwa liñolo kutoloka mabaka akuhana kumufa liñolo la kukubukanya sicaba, nasika memiwa nikuli ato ikalabela hala kupo yahae. Lizazi leliswana, babeleki ba mubilaeli hane bapatehile kulukisa sibaka, Ntemwa, asindeketilwe ki malonda bakwamukunda, atoshokomoka, ni kulemusa babeleki kuli hakuna mukiti oka ezahalela mwa muyaho. 

Ntemwa ukulubelwa kuli nalaezi kuli muyaho ukwaliwe, ili kuhanela Chola kuzwisa lisebeliso zahae.

Kakuya kataba ye isizwe kwa Khuta Yepahami ki muyemeli wahae Vernon Lutibezi kuzwelela kwa kampani ya bayemeli ya Kamwi Law Chambers, kasamulaho akulumelelwa kusebelisa muyaho kikatengo katolopo, Chola nakalile kuitukiseza mukiti kakulifa baopeli ni kuleka libyana ni lisebelezo zeswasina kulifa litifo zakwamuseto, linzila, kubabaza, matiketi, lico, malobalo, lipula, nibane baeza musebezi, silelezo, mulilo wamagesi, mezi, kulundulula, kulukisa, kubakanya, ni muzamaisi wakezahalo masheleñi alikana N$423 405.73.

Kuekeza ubulela kuli naitekezi kufumana kekezo yelikana N$600 000 kakulekisa matiketi, libaka zakulekiseza, lico, kono zeo neli palile bakeñisa Ntemwa, mi nalikile kufukuza sinyehelo, kakulekisa lino kwa linwelo la bucwala. Ubulela hape kuli na swabisizwe mwalitaba za lipapali. Kutisa cwale, meya hasika kuta kuyena kumulemusa libaka hana ezize zana ezize nihane alikile kumulizeza ni kumulumela mañusa fa foni, mi hape ubulela kuli meya nahanile kulifa lisinyehelo zahae. Kacwalo ukupa Khuta Yepahami kufa taelo yakuhapeleza Ntemwa kulifa lisinyehelo zahae ni kekezo ya 20% kuzwa lizazi katulo ifiwa. Kanako yakuhatisa hakuna kubaba zekiswa yana alabile kana balwanisana ni taba yeo.