Omunambelewawiliki wokakomisi kedina National Planning Commission I-Ben Nashandi okwa koleka kutya okwa lekelwa mo moshipangelo noku li paife keumbo.

Edi okwe di popya pefimbo a ninga eenghundafana naKundana onghela.

Okakomisi koNational Planning Commission ohaka ningi omafaneko omayambule po eepoloyeka depangelo.

Nashandi ou e li yoo natango mwene womukunda Iikokola kOshitukulwa shaShikoto okwa ti okwa lekelwa moshipangelo momafiku 10 Januali.

Nashandi okwa li a tambulilwa moshipangelo shopaumwene Ongwediva Medi Park omo kwali ta mono omayakulo opaunamiti konima eshi a monifwa oshiponga.

Okwa yashwa nondjebo neudo momafiku 2 Januali pefimbo kwali ve li moshiongi shokukandula po omukundu kombinga yomulumenhu umwe po a wedela ekove laye ina pewa epitikilo.

Nashandi okwa li ve li moshiongi pamwe nakapatashu womukunda waye Sam Pendapala Nepando.

Efiku olo, Nepando okwa xulifila ponhele opo eshi a yashwa nondjebo komulumenhu tuu oo e li kufila edu shi heli paveta.

Omutamanekwa weedula 59 Sinskus Johannes oku li modolongo noshibofa shaye osha undulilwa komafiku 18 Juni 2026 nelalakano lokuninga omakonakono omoule.

Nashandi okwa popya ta ti okwa pandula oshiwana eshi sha kala noku mu tula momailikano okuveluka.

“Onde mu pandula amushe komahalelo yambekeko eveluko. Natu kale ni nombili Ovanamibia nokutwikila okualikana,” ta ti.

Nashandi okwa yelifa ta ti moshilongo omu na ovanhu vamwe ve na omhepo ya satana novapumbwa omailikano shaashi ove na omalalakano okulongela vakwao ominyonena.

“Onda kumwifwa konghundana yoipupulu tai ti kutya onda xulifa. Onghundana ei okwa li ya tulwa kepandja loFacebook lehangano lokukundaneka Kalahari,”ta ti.

Okwa ti onghundana ei oya tilifa oshiwana osho yo ofamili yaye.

Nashandi okwa kumaida omahangano okukundaneka opo a kwashipaleke kutya otaa yandjaneka ouyelele womondjila.

Okwa pandula eendokotola novapangi eshi va kala nokuungaunga naye pefimbo a li moshipangelo.

“Omwenyo wa Sam Nepando nau tumukwe nombili ye a teelele ongula yependuko. Ombili kaume kange enda po nawa,” ta ti.

fhamalwa@nepc.com.na