ONGWEDIVA – Omukulunhuwiliki woshikondo shomavyulonghalo needolongo Commissioner-General Raphael Tuhafeni Hamunyela okwa ti natango oshiwana onghe nga tashi twikile okutwalela ovanadolongo omapangwe neengodi.

Okwa weda ko ta ti ovanambelewa tava wilike komavyulonghalo navo ohava lopotwa tava yandje kovanadolongo oinima oyo ina i pitikwa okukala novanadolongo ngeenge ve li mokakuma ngaashi eengodi.

Hamunyela okwa ti onghalo yokutwaalela ovanadolongo eengodi nomapangwe oi li omukundu wa kula wa didilikwa komavyunghalo a yooloka moshilongo.

Okwa ti evyulonghalo laWindhoek olo unene la didilikwa ku na ovanadolongo tava kwatwa neengodi nomapangwe.

Hamunyela okwa ti evyulonghalo laWindhoek ola tulwa eengodi dokopala odo da di kala tadi longifwa kovanadolongo ngeenge va hala okupopya novakwapata vavo.

“Omunadolongo okwa pumbwa okukala e na okakalata ku na oshimaliwa opo a dule okudengela omunhu,” ta ti.

Okwa weda po ta ti evyulonghalo yoWalvis Bay ota ku tulwa nako ongodi yokopala.

“Ohatu ka tula komavyulonghalo a yooloka eengodi dokopala opo tu kelele onghalo yovanadolongo ve na eengodi meedolongo,” ta ti.

Hamunyela okwa ti ovanadolongo otave shi endifa nawa okulonga oikulya yavo vene tashi pitile okulonga moikunino oyo i li komavyulonghalo.

“Ohatu twikile okuxwaxwameka ovanadolongo opo va longo nondjungu moikunimo molwashi otashi kwafele omandiki a kale e na oikulya ya wana,”ta ti.

Okwa yelifa ta ti komavyulonghalo oku na oikulya ya wana ya dja moikunino tai longwa kovanadolongo.

fhamalwa@nepc.com.na