Auleria Wakudumo 

Ehangano loStanlib Namibia ola yandja ekwafo lokatemba oko haka dulu okushingwa mefululu oshoyo ocompiuta komuhongwa eli mondodo oniheyali koDr. Albert Kawana moRuacana. 

Stanlib okwali a yandja nale ekwafo lafaafana eshi a hyandja okatemba komuhongwa oye tuu oo – Michael Shekutamba – mo2021 eshi ali mondodo oninhe.

Omunambelewa koshikondo shoimaliwa moStanlib Phillip Ashimbanga okwa holola kutya okatemba aka vali va yandja mo2021 inaka kulupa ashike, ndele koo ihaka dulu okushingwa mefululu koo inaka yeluka po ngaashi oko va yandja paife. 

“Okatemba hatu yandje okeli pomufika wopashinanena. Molwa onghalo yefululu noukokule wofikola, okatemba aka otaka ka kwafela Michael novakulunhu vaye okuya kofikola,” Phillip ta ti. 

Michael okuna needula 14 nokwa dalwa noulema womaulu oo hau mu imbi okweenda kuye mwene ngaashi ounona vakwao.

Ina yaMichael, Aina Hango okwa holola kutya osha kala shidjuu okututa Michael efiku keshe manga inava mona ekwafo lokatemba. 

Hango okwa ti okudja kondodo yopedu fiyo omondodo oninhe, ova kala hava umbata Michael okumweeta kofikola. “Okwa kala ha yambulwa kuxe okudja keumbo ile efimbo limwe omumwainamati naye oha dulu okukwafela xe. Oshali shidjuu shaashi oshivixa shaye osha ka kala tashi ende okuya pombada shoo noshinano okudja keumbo okuya kofikola oshile neenghono,” Hango ta ti. 

Hango okwa ti ova ka ninga elao eshi xe yaMichael a mona oilonga pofikola opo onga omuwapaleki nokwa kala ngaho temu yambula vaye pamwe naye. 

Eshi Michael aya mondodo oninhe, ye Kalunga otemu tumine omujnasamaria omunamutimanghenda, ehangano loStanlib eshi lemu pa okatemba. 

Hango okwa ti kutya nonande okatemba ka kulupa paife, okeva kwafela lela. 

“Ohandi pandula ehangano loStanlib eshi tali twikile okukwafa omumwange,” Hango ta ti. 

Hango okwa holola yo kutya ova taalela eshongo la kula eshi Michael a uka mondodo onihetatu. 

“Eefikola odo dina ondodo onihetatu odili kokule naimwe oko twali hatu ningile omakamba vati oya hada nale. Nande ongaho, itatu shuna omutwe moipeta nondina etimwaumbile kutya Kalunga ote tu kwafa ngaashi a kala nokukwafa efimbo lile,” Hango ta ti. 

Umwe womavahongi pofikola opo tuu opo, Angels Walubita okwa indila ehangano lostanlib opo li kwafele yo omunafikola wavo umwe, Murangi Jafet, weedula 17 eli mondodo oninhe naye okwa pumbwa ekwafo lokatemba ile leenghaku dopashinanena molwa oulema womaulu. 

Jafet otaku hokololwa ina dalwa omunghundi ashike okwa wila vati momundilo eshi ali ohanana ndele ta pi olutu alishe, eemhadi da pya filufilu.

Nonande Jafet a pya eemhandi, oha endifa ashike omalu oo nao a pya, a mangelwa oituta opo aha like kedu. 

Ofikola yoDr. Albert Kawana oina ovahongwa ve fike po342.