Auleria Wakudumo 

Lisa Nekanda okakadona oko haka kufa ombinga momafiyafano oukadona dingi unene konooli okwa holola kutya neudo okwa tokola okuyambula po oshitalendi shaye nokuvena omapaya mahapu. 

Lisa Nekanda oye ena epaya lokakadona dingi momaulikilo oipindi aNgwediva 2025 olo a vena eshi a kufa ombinga mefiyafano lokakadona ding iolo la liko muAuguste odula ya dja ko. Neudo, Nekanda okwa tokola okukufa ombinga mefiyafano lokakadona dingi Oshakati Totem oshoyo omafiyano makwao oo taa landula ko ooh aa yandje omhito koukadona opo veli yambule po nokutwa vakwao omukumo. 

“Ondina yo ondjodi yokukufa ombinga mefiyafano lokakadona dingi moNamibia hano Miss Namibia meedula dokomesho ngeenge ndeli longekida nawa okutambula ko omashongo oo hau ya nefiyafano lakula moshilongo,” Nekanda ta holola ngaho. 

Odula ya dja ko, Nekanda okwa kufa ombinga momafiyafano atanho. 

Momafiyafano aa, okwa vena po okakadona dingi momaulikilo oipindi mOngwediva. 

Natango okweya okakadona kotete dingi momaulikilo oipindi aNdangwa oshoyo Opuwo. 

Nekanda okwa li yo a vena po epaya lokakadona dingi momaulikilo oipindi Oshikuku mo2024. Mokukufa ombinga kwaye momafiyafano aye, odona ei oina ohokwe noya popila ehongo lokoiputudilo yopaungoba. 

Nekanda okwa ti ota popile ehongo eli shaashi okuli omulihongihongi moshilongwa shomwaalu oshoyo odesign and technology oyo inasha noiputudilo yopaungoba. 

Nekanda okwa holola yo kutya momukokomoko wokukufa ombinga mefiyafane po eli, okwa mona eshongo eshi oinima konyala aishe ya ningwa moule woshivike. “Molwaashi omadingonoko aeshe okwa ningwa moule wefimbo lixupi, onda loloka neenghono ashike nande ongaho inandi kwatwa kedilaadilo lokushuna omutwe moipeta shaashi onda li nda hala okuvena,” Nekanda ta holola. 

Nekanda okwa hovela nale okutula aishe oyo a hala okulalakanena moilonga. Pehovelo lomudo 2025, Nekanda opamwe nehangano lokukalela po ovalihongimOshanahano(Nanso) ola yandja oututa voukadona ve dule 100 nokundungika ovahongwa pofikola. 

Eshi okwati oshili shimwe osho ta lalakanene okukwafela ounona voukadona va kale mofikola. 

-awakudumo@nepc.com.na