Ouministeli woikwameni, eameno nomataulukilo okeengamba owa pitifa eepoosa domadeulo opolifi eendodo da yooloka di li 2 000, nelalakano lokukandula po omhumbwe yokuhae na oilonga moshilongo. 

Okudilila kolopota ya yandjwa komupopiliko wopolifi moNamibia Kauna Shikwambi, oya yelifa kutya momwaalu wovanhu 2 000 otamudi ovanhu 600, ovo va teelelika va dje koNational Youth Council onhomenawina navo va teelelika va hadife omadeulo aa. 

“Elalakano okuyandja omhito kOvanamibia ava hava kala tave lideula kendiki eli, ndele vahapu vomuvo ihava mono oilonga,” ta yelifa. 

Shikwambi okwa twikila yo kutya natango ei omhito yaava va dja koiputudilo ya yooloka, ve li hongela omaifano ayooloka, ndele fiyo onena inava mona oilonga. 

“Shima we lihange wa kufa ombinga momadeulo aa, ndele taa xulu, ou na ashike okutwalwa u ka longele keembonge edi hadi longo naashi we lihongela koshiputudilo,” ta ti. 

Ava va hala okuhadifa eeposa edi ove na okukala ve na oufemba we lixwa po woshilongo. 

Omukwashiwana oo na kale yo e na odjapo yondodo onhi-11 ile onhi-12, osho yo oitwa i li omi-25 ile ya koya po moilongwa i li ihamano osho yo o-E mOshiingilisa. 

“Ngeenge okwa dja koshiputudilo shopombada na kale e na odjapo ya dja po NQF 5 ile i dulife po,” Shikwmabi ta yelifa. 

Okwa twikila kutya ovanelao ava va ya koiputudilo yopombada molweefo eli ngeno ova va ngaho ve lihongela Policing ile Legal Studies, Cyber Security, Accounting oshoyo Auditing shaashi oko unene va pumbiwa koikondo oyo. 

Ovakufimbinga otava indilwa va kale ve na oibofa yapwa kopolifi. 

Ova pulwa yo natango va kale va kufwa omanyala, osho yo va yandje eembapila di na sha nomahokololo oukolele wavo. 

Eembapila dokuudifa eepoosa edi otadi hangika peembelewa keshe depangelo, do ngeenge oda pu okuhadifwa nadi umbwe keembonge dakula dopolifi osho yo peesitaasi dopolifi. 

Ovakufimbinga momaindilo aa otava indilwa ve likaleke kokule noimbuluma shaashi otashi va kanififa eemhito. 

-taimihaihambo2000@gmail.com