Oshikundaneki shedhina African Leadership Magazine (ALM) koLondon osha gandja epapa kOmupresidente gwaNamibia Netumbo Nandi-Ndaitwah, ongomuleli dhingi muAfrica gwomumvo 2025. 

Namibia natango okwa mono epapa ndyoka lya pewa minista guuhaku nonkalo nawa Esperance Luvindao, ongomuleli osho wo omuxwaxwameki dhingi guundjolowele muAfrica. 

Omukuluntu guuyuki Mandisa Maya, koSouth Africa, okwa sindana ongomuleli omukiintu dhingi muAfrica. 

Omukwatelikomeho gwoshifokundaneki sho-ALM, Ken Giami, okwa nyola kutya ongaAafrica otaya pumbwa okukala taya pandulathana nokundhindhilika mboka taya longo nawa nokuhumitha komeho Africa. 

“Mboka ya kala nokushanga nawa kombinga yAfrica nokuhumitha komeho, otaya ka mona omapapa gawo omumvo tagu ya okuza momasiku 26 sigo 28 yaFebuluali, oshiindingili shoka tashi ka ningilwa koAccra shaGhana,” a shanga ngaaka. 

Aanamibia osho wo Aafrica okupitila komalungula oya kala nokugandja omayambeko osho wo olupanda kOmupresidente Nandi-Ndaitwah. 

Ehangano lyoNamibia Investment Promotion and Development Board (NIPD) nalyo olya pandula omupresidente gwoshilongo osho wo Luvindao sho ya sindana ngaaka. 

“Omapapa ngoka otaga ulike eyitulemo lyaaleli muAfrica alihe osho wo poompito adhihe okuza kuunangeshefa, konkalo yoshigwana osho wo okuhumitha komeho Africa,” ya shanga ngaaka. 

NIPD okwa ti, ota nyanyukilwa pamwe nayo. 

“Okulela kOmupresidente Nandi-Ndaitwah okwe tu pa omukumo, kashi shi ashike okupopya mokana ihe elunduluko otu li wete,” Maria Kapulwasha a shanga ngaaka komalungula. 

Ta ti, epapa ndyoka a pewa otali ulike shili oonkondo, eyitulemo nohole e na noshilongo she osho wo iilongo yaAfrica. 

-vkaapanda@nepc.com.na