OKAHAO – Oshilyo shomutumba wopashiwana Natangwe Iithete okwa lombwela ovalumenhu ta ti inava longela vali ovakainhu omunyonena ngeenge va fiwa po.

Iithete edi ikwe di popya pefimbo a poipifa oshiongi sho Swapo kOkahao.

“Okufiwa po komukainhu kaku shi exulilo lounyuni molwashi ovakainhu natango otava dulu okumonika,” ta ti.

Edi Iithete okwe di popya mexuliloshivike pefimbo loshikonga shoSwapo sha li kOkahao.

Okwa didilikwa ovakainhu va ninga oihakanwa yokudipawa nokumonifwa oiponga kovalumenhu wavo koitukulwa ya yooloka.

Iithete ou a li omupeduminista woimaliwa okwa popya ta ti oshitukulwa shaMusati osha lopotwa ovakainhu vahapu va dipawa nokumonifwa oiponga kovalumenhu.

“Omukainhu oku na oufemba wokufiya po omulumenhu waye she likwatelela komatomenho onhumba,” ta ti.

Okwa ti itashi ti kutya ngeenge omukainhu a xulifa po ekwatafano lopaihole na dipawe.

“Omulumenhu ngeenge okwa li a hombola ota dulu okumona po omukulukadi waye umwepo,” Ithete ta ti.

Okwa kumaida ovalumenhu opo va kale ovatilikalunga nokufimaneka ovakainhu vavo.

“Okudipaa ka kushi ekandulepo lomukundu ndele okueta po omukundu,” ta ti.

Okwa ti ovaholafani ngeenge ove na oupyakadi kombinga yomakwatafano opaihole nava ka konge omakwafo kovaxungimwenyo ile ovafitaongalo.

Okwa lombwela ovanyasha opo ve li humbate nawa noshoyo okuke li honga koiputudilo yopaungoba.

“Oshilongo osha pumbwa ovanyasha va longwa. Swapo ota twikile okuyandjaneka omandiki opoungoba opo ovanyasha ve ke li honge.

Pefimbo loshikonga, Iithete okwa lombwela oshiwana opo shi ka hoolole Swapo molwashi Swapo ongudu ina olukeno noshiwana.

-fhamalwa@nepc.com.na