ONDANDWA – Omunawino moipambele yoikwaveta noku li hahende a shivika nawa moshiwana Sisa Namandje okwa kumaida oshiwana opo shi xulife po okuningila omatilifo ovanailonga tava longele keemhangu molwaashi osha nyika oshiponga.

“Otashi eta omunhu a kwatwe po shaashi osha puka,” ta ti.

Namandje okwa ti ovanhu tava longo koshikondo shoikwaveta ngaashi keemhangu ova pumbwa okukala va manguluka ngeenge ve li mokati koshiwana.

Okwa yelifa ta ti haende wepangelo ile wopaumwene nakeshe tuu omunhu ta longele komhangu ina pumbwa okuningilwa omatilifo ile a ponokelwe ngeenge ve li mokati kovanhu.

“Otava longo ashike oilonga yavo ve i linekelelwa ngaashi naana ovanhu aveshe koikondo ya yooloka tava wanifa po oilonga yavo, itava ningilwa omatilifo,” ta ti. Namandje edi okwe di popya onghela pefimbo a nyamukula omapulo kombinga yoshiningwanima shomukulupe a ningila omunambelewa omatilifo efyo ha longo komhangu.

Omaandaxa, omukulupe Levi Vries weedula 62 okwa pewa omhito yokulifutila mo modolongo noshimaliwa N$3 000 pefimbo a holoka momhangu yaNdangwa.

Oshibofa shaye osha undulilwa komafiku 4 Maarsa nelalakano lokuninga omakonakono omoule.

Omukulupe ou okwa kwatwa po oshivike sha dja ko eshi a shakaneka omunambelewa ta longele komhangu yaNdangwa ndele te mu lombwela kutya “ohatu mu mane po neudo.”

Omukulupe ou okwa li omunambelewa mukulu woshikandjohongo shaLuno.

Omunambelewa ou okwa lopotela opolifi ndele omukulupe ou ta kwatwa po. Okwa didilikwa oshiningwanima shefyo la ustine Shiweda ou kwa li ta longele komhangu yaNdangwa sha eta oumbada kovanailonga vokeemhangu paife.

Shiweda okwa xulifa konima yoivike itatu eshi a ponokelwa kovalumenhu ndele tave mu tile omeva oudio.

Oshiningwanima osha ningwa omudo wa dja ko keumbo laye mOndagwa ashike okwa kala moshipangelo fiyo ta xulifa.

Natango, neudo omulumenhu umwe naye okwa kwatwa po eshi a ningila omatilifo omunambelewa ta longele komhangu yaGroofontein.

-fhamalwa@nepc.com.na