IIPANDA – Amushangandjayi gwoSwapo Sophia Shaningwa okwa kumagidha mboka taya ka yambidhidha aakulupe esiku lyomahogololo ya kale ye li muushili.
Shaningwa okwa ningi eindilo ndyoka koshigongi shoSwapo sha li ko Omaandaha komukunda Iipanda moshikandjohogololo Ogongo Omaandaha.
Kakele kaashoka, Amushangandjayi gwoSwapo okwa londodha wo aakalimo yomoshikandjohogololo shaGongo ya ka hogolole omuulikwapresidente gwoSwapo Netumbo Nandi-Ndaitwah.
Ta tangumuna Ndiatwah ta ti, omuleli gwoshili, omunambili, ngoka e na oshigwana komutima nokwe shi halela uuwanawa.
“Nandi-Ndaitwah okwa kondjela emanguluko lyoshilongo shika, nelalakano lyokweeta ombili moshilongo ngaashi tali tyapulwa kukehe gumwe nena,’’ ta popi ngaaka.
Shaningwa ta ti inaya hala ongundu Swapo yi fumvikwe kaatondi mboka ye yele Swapo omolwaomatompelo ye ga shi yo yene, ya hala ondjokonona yaSwapo yi dhimbiwe.
Ta ti, ongundu Swapo inayi sindika, naalanduli ayehe naya kwashilipaleke kutya omawi gawo ogu uvika okupitila mokuhogolola esiku ndyoka lya tegelelwa uule nethimbo.
Ta lombwele oshigwana kutya inashi fundjwa koongundu dhoompilamena, tadhi uuvaneke iifundja kutya otadhi eta elunduluko uuna ya hogololwa ya lele oshilongo shika.
Ta pula kutya otaya eta elunduluko lyini moshilongo sha mangululwa kwaamboka ye shi lilwa shi manguluke.
“Ongundu tayi lele oya e ta omalunduluko nomahumokomeho ogendji, tandi ga tumbula ngaashi oondjila, oosikola, iipangelo, omagumbo oshowo omeya nomauwawa ogendji moshilongo.
Shaningwa okwa thindi omuthindo kutya oshigwana inashi pukithwa koongundu opo dha totwa po ohela dhaa na omalalakano goshili.
Esiku ndyoka Shaningwa okwa li a taamba ko aantu ye li 15 ya li ya zi koongundu dhoompilamena.
Omuhwahwameki gongundu yoSwapo kOgongo Leonard Nangolo okwa kumagidha aakalimo ya ka hogolole ongundu Swapo momasiku 27 gaNovomba nuumvo.
Omunyasha gumwe a li poshigongi mpoka okwa ti, okwa shuna kongundu Swapo oshoka okwa ndhindhilike kutya omalunduluko nomauwanawa otage ya.
“Onda li nda kutha ondjila ya puka ashike nena onda shuna kegumbo,” ta popi ngaaka.
Ta kumagidha aanyasha aakwawo ya ka hogolole oSwapo oshoka oyo ashike ongundu yi li moshili.