Auleria Wakudumo
Omukulunhuwiliki mouministeli wouhaku nonghalonawa Penda Ithindi okwa holola kutya ouministeli otau ningile efyo lomukalimo waTjiwarongo Elijah Areseb, omulumenhu weedula 21 omakonakono.
Ovakwanedimo osho yo ovakalimo vomOtjiwarongo ova holola kutya Areseb ina fiilwa oshisho vati kovapangi ye ina mona ekwafo lopaunamiti pefimbo.
Areseb vati okwa ya koshipangelo e na ouyehame weshikisha osho yo oudjuu mokufuda koshipangelo shaTjiwarongo momafiku 31 Januali 2026. Otaku hokololwa kutya Areseb okwa shunifwa keumbo nonande a li ita dulu okufuda nawa.
Areseb okwa shuna koshipangelo momafiku 2 Febuluali 2026 opo a ka konaakonwe omukifi wo-TB ashikie omakonakono okwa dja ko kutya ke na omukifi wo-TB.
Ovakwanedimo vaye ova holola kutya natango okwa shuna ko momafiku 5 Febuluali 2026 molwaashi ita dulu okufuda nokwa xulifa konima yefimbo shaashi ina mona ekwafo lopaunamiti la wana.
Ovakwas h iwana pamwe novakwapata vaye ova li va ninga omunyanyo wopambili onghela omo tava pula ouministeli wouhaku shi na sha nefyo laAreseb.
Ovakwashiwana ova tula mo omunyanyo wopambili okudja modoolopa moTown Square Mall fiyo okoshipangelo shepangelo shaTjiwarongo oko va yandja omakemo avo.
Oshiwana osha pula oshipangelo shaTjiwarongo opo shi lundulule omayakulo asho opaunamiti. Ova holola yo kutya ova loloka okukanifa ovaholike vavo momukalo wa faafana omo ovanaudu ihava pewa ekwafo lopaunamiti.
Ithindi okwa holola kutya ova mona omakemo ovakwashiwana novakwapata vaAreseb osho yo omapulo ofulundudu okudja koikundaneki ya yooloka.
Ouministeli owa ti owa kufa ko omapopyo okutya nakufya ina pewa ekwafo lopaunamiti notau ka katuka onghatu yopombada notau ka ninga omapekapeko okuholola efiloshisho laAreseb eshi a li moshipangelo.
“Nonande out udite omakemo ovakwashiwana ovo va hala enyamukulo meendelelo, ohatu pula opo ve lididimike opo tu landule omilandu opo tu dule okuyandja enyamukulo lomondjila,” Ithindi ta holola ngaho.
Ithindi okwa kwashilipaleka kutya ngeenge ouministeli owa mono oumbangi moshiningwanima eshi, otau ka katuka onghatu yopombada naava ve na mo onyala moshiningwanima eshi otava ka pewa ehandukilo.
Ouministeli wouhaku owa yandja omahekeleko kovakwanedimo vaAreseb osho yo ovakalimo vomOtjiwarongo koonono.
“Okukanifa omunyasheelela itashi lulumike ashike ovakwanedimo vaye ndele nafye yo. Otu udite onghalo omo mu na ovakwanedimo novakalimo noha tu pula ve tu pe efimbo la wana okuninga omapekapeko moshinima omu,” Ithindi ta ti ngaho.
Ithindi okwa kwashilipaleka kutya ouministeli otau twikile okuyandja omayakulo ongushu noku na ombilixa kOvanamibia aveshe. Ithindi okwa ti ouministeli otau ende yo nokukandula po omakemo oshiwana mouhaku.
-awakudumo@nepc.com.na