ONDANGWA – Kakukutu komatanga gopolisi Joseph Shikongo okwa kumagidha aapolisi mboka taya ka zala omaguwo gawo nuumvo muMai, yaa ka taambe oombumbo uuna ya tameke iilongo yawo. 

Shikongo okwa kumagidha ngaaka sho a li ta gandja omalongo kaapolisi taya dhewulwa koDander Ashipala kOndangwa Omaandaha. 

“Okutaamba ombubo kaku na uuwanawa washa, ihe otaku ku yonene ashike iilonga, onkene onda hala mu ka longe neyitulemo, uuyuki osho wo elandulathano, ngaashi naana mwa dhewulilwa,” ta kumagidha ngaaka. 

Ta ti, aapolisi yamwe oya kanitha iilonga omolwa ya dhanene iilonga yawo. 

Uuna wa taamba ombumbo, nena ino simaneka iilonga yoye. 

Shikongo okwa ti, elalakano lyeni okutula po omalandulathano osho wo okukandula po omaupyakadhi ga taalela oshigwana. 

“Omupolisi iha gwedha ko komawudhigu ihe oha kandula po nokutula po omalandulathano opo oshigwana shi kale shi na ombili sho sha manguluka,” ta popi ngaaka. 

Ta kumagadha kutya uuna to longo nuuyuki noneyitulemo oho yelwayelwa sigo wa yi poonkatu oonene. 

Kakukutu komatanga Shikongo okwa gandja oshiholelwa she ta ti, okwa li a longele etanga lyopolisi omanga e na omimvo omi-20 nasha, ihe ke na esiku a longo nuulingilingi oshoka oku shi kutya kawu na uwanawa washa. 

“Onda longo nuudhiginini okuza petameko sigo nda thiki mpaka nena ndi li, kape na kutya onda ningilwa pooha kulye, ihe iiyimati yoonkondo neyitulemo lyandje miilonga,” ta popi ngaaka. 

Shikongo esiku ndyoka okwa li a pandula wo aapolisi sho nayo yi itula mo momadhewulo gawo sigo opehulilo. 

Ta ti, yamwe ohaya hulile oondjilakati omolwomayihumbato gawo osho wo okwaagwanitha po oompango. 

“One aanelago, mwa tothwa mokati kayakweni, nayo ya gwanitha ayihe tayi pulwa ihe inaye shi pondola,” ta ti ngaaka. 

Ta thindi omuthindo kutya naya ka longele oshigwana shawo nuuyuki osho wo nelandulathano. 

-vkaapanda@nepc.com.na