Kansela woshikandjohoololo shaUukwiyuushona Andreas Amundjindi okwa ti epangelo otali ka yandja oukalata (vouchers) vokulanda oikulya komaumbo 2044 moshikandjohoololo shaye.

Amundjindi okwa ti oukalata voikulya ova tulwa ongushu yoikulya yeemwedi nhatu – Apiilili fiyo Juni.

Okwa ti ombelewa yaye oya shivifila nale ovanhu ovo tava ka pewa oikulya molwashi ova didilikwa ove ve li momhumbwe yoikulya mwa kwatelwa oshiwana shovayelele.

Opolongalama yokuandjaneka oukalata vokulanda oikulya oya totwa po kombelewa yomupilima minista.

Ovanhu koitukulwa ya yooloka ova tameka nale okulongifa oukulata vokulanda oikulya yavo keefikola.

Eefitola ashike dimwe odo da tofwamo tadi ka longifwa kovanhu va pewa oukalata ava.

Kansela okwa pandula epangelo eshi ta li twikile okuyandjaneka oikulya yoshikukuta koshiwana unene tuu ovo ve li momhumbwe.

Okwa ti oshikandjohoololo shaye na sho kwa li sha kumwa kefundja omo omaumbo nomapya oshiwana kwa li e li koshi yomeva.

“Otwa pewa elombwelo kombelewa yomupilima minista opo tu shange omadina oovene yomaumbo va ninga oihakanwa yefundja opo va dule oukapewa omakwafo kepangelo,” ta ti.

Okwa weda po ta ti epangelo ota li shi endifa nawa okuyandja oikulya koshiwana molwashi fiyo opapa ka pena omunhu a lopotwa a xulifa kondjala moshikandjohoololo shaye.

Kansela okwa ti oshikandjohoololo shaye osho shimwe shi hadi oshiwana shovayelele ashike vahapu ove na oufemba konima eshi a ninga omalongekido okufana ombelewa yoikuyandja omikanda.

“Otuna oshiwana shovayelele shihapu ha shi mono oshimaliwa shopendjela molwashi paife ove na omaufemba,” ta ti.

Okwa lombwela oshiwana opo shi longife oukalata pamukalo muwa ndele ha ku landifapo oikulya yoshikukuta keendingosho.

Amundjindi okwa kumaida oshiwana opo shi twikile okulongela kumwe nombelewa nokukala shi na ekwatafano liwa. fhamalwa@nepc.com.na