Auleria Wakudumo 

Elelo loshitukulwa shaShikoto ola holola kutya otali ka eta exumokomesho moshitukulwa mokuninga omikunda Onayena, Onyuulaye, Oshivelo noTsintsabis eedoolopa okweeta omayakulo popepi noshiwana nokuyambula po oshitukulwa. 

Omunashipundi wel elo loshitukulwa Samuel Shivute okwa shivifa eshi pefimbo ta lekele okuyandja oshipundi komunashipundi mupe. 

Shivute okwa holola kutya eedoolopa dipe otadi ka teelelwa di lundulule onghalo yovakwashiwana pomudingonoko. 

Elelo loshitukulwa oli na omhangela yokulonga nokuyandja eepolota di na omeva, olusheno, oundjuwo neemhumbwe adishe da wana po di li 356 mOnayena Extension 1, 286 mOnyuulaye Proper nadi li 311 mOshivelo Extension 1. 

“Exumokomesho eli otali ka lundulula onghalo yomaumbo momikunda edi da tumbulwa petetelo. Elunduluko eli otali ka yambula po yo eengeshefa dokomukunda di uye pamufika wopombada,” Shivute ta ti. 

Elelo loshitukulwa shaShikoto ola hovela nale moTsintsabis omo la tunga ombelewa oyo hai ifanwa Tsintsabis Settlement. 

Pefimbo tava holola elunduluko olo tali ka ninga moshitukulwa, elelo loshitukulwa ola lekela yo omunashipundi welelo loshitukulwa, pamwe novanambelewa vamwe ovo va fiya po ombelewa. 

Omunambel ewakulunhu mombelewa yelelo loshitukulwa Christella Mwenyo okwa holola kutya ovanambelewa ovo va lekelwa ova kala nokulonga noudiinini novakwashilipaleka kutya ova yambula po Oshikoto. 

Okwa ti oshitukulwa osha li sha dengwa pomutima komashongo mahapu, mwa kwatelwa oCovid-19 noikwafifohongo tai shongola ashike ovo vali koshitaelinga ova finda omashongo aa. 

“E litulemo lavo moilonga itali dulu okuyelekwa, na katu na fiku tu va fute sha wana poilonga ei va longa,” Mwenyo ta ti ngaho. 

Omunashipundi opamwe novanambelewa vakwao ova kala nokukondjifa okweeta omayakulo popepi noshiwana nokueta exumokomesho moshitukulwa shaShikoto osho sha tulwa nale moilonga. 

Shivute okwa holola yimwe yomwaayo ya hangwa kelelo loshitukulwa olo la dja koshipundi, mwa kwatelwa etungo loNehale Lya Mpingana nombelewa yoshikandjohoololo yaGuinas oshoyo oTsintabis settlement. 

Elelo loshitukulwa ola kwashilipaleka yo kutya ola yambula po eengeshefa dovanangeshefa vanini moshitukulwa eshi la tunga omatala kOmuntele osho yo oo e li metifa lokutungwa kOshivelo okunghonopaleka oipindi momikunda. 

“Okueta omayakulo popepi noshiwana okwa yambuka po. Omhumbwe yomeva oya lunduluka okudja keepelesenda 69.7 okudja mo2011 fiyo  okeepelesenda 90.2 momudo 2023. 

Eshi osha ningwa okupitila mominino domeva, okufa emboola, ekwafo olo la dja kepangelo. Elelo loshitukulwa ola tunga yoo oundjuwo vopomufika wopombada veli 580 momikunda,” Shivute ta holola ngaho. 

Elelo loshitukulwa ola tunga yoo omaumbo melongelokumwe noprograma yokutunga omaumbo, oBuilt- Together okudja mo2020 fiyo 2025, omaumbo a hanga po 19, olusheno naikwao imwe ya wedwa po. 

-wakudumoauleria@gmail. com